«Рахмат, Башкортостан!» конкурсыш ушнаш лиеш

Республикын шочмыжлан 105 ий теммылан пӧлеклыме «Рахмат, Башкортостан!» конкурсыш 13 октябрь марте ушнаш лиеш. Конкурс кундемысе сай вашталтыш-влак нерген каласкалаш йӧным ышта, илышын тӱрлӧ шӧрыныштыжӧ - экономика да образований гыч тӱҥалын, тӱвыра да чоҥымо паша марте - сай лектышым ончыкташ полша.

Мом ыштыман? Конкурсым «ВКонтакте» соцлаштыкысе «Алга, патриот!» тӱшкаште эртарат. Тушко пурен, «Уверым темлаш» кнопкым темдалын, поро паша нерген возымыда дене палдарыман. Тиде тыланда неле пагытыште полышым пуышо, поро пашалан кумылаҥдыше айдемылан тауштымо ой, тыгак Башкортостан мо дене келшыме, шочмо кундемысе пӱртӱсын моторлыкшо нерген шомак лийын кертеш - усталык кумылдам ончыкташ нимогай чарак уке.   

Сеҥышым кузе ойырат? Тауштымо шӱлышан эн оҥай усталык паша-влакын авторыштым шергакан пӧлек (робот-пылесос, смартфон, ушан колонка) дене суапландарат. Кажне рушарнян вич сеҥышым палемдат. Тушеч кок сеҥышыжым калыкын полшымыж дене (Тиде эн шуко «лайкым», комментарийым, репостым чумырышо пост-влакын авторышт), кумытшым «случайный выборка» йӧн дене ойырат. Нунылан пӧлекымат кажне арнян торжественно кучыктат.

Республикысе калык мо нерген воза, видеом ышта?

Конкурслан ямдылыме паша-влак тӱрлӧ улыт. 

Буздяк селаште илыше Л. Галлямова кок изи икшывыжым эмлыше педиатр Лия Газизова нерген каласкален. 

О. Петрова шымше классыште тунемше-влакын СВО-н салтакше дене пырля Торатау курыкыш экскурсийыш мийымышт нерген возен. 

Альшей районышто илыше Е. Егорова верысе рвезе-влакын неле атлетика дене республикын первенствыштыже сеҥымышт дене палдарен.