КЕЧЕ, ЛЕК…

Ик эрдене Маядык ялнан ватсап группыштыжо оҥай полемика лие. Ик ӱдырамаш йӱр эре йӱрмылан мурын ужашыжым возен: «Кече, лек, кече, лек, ваштар паньым пыштем, ӱян мелнам пукшем...» «Молан мучаш марте ышда возо?» - йодо пенсийыште улшо военрук Вячеслав Михайлович. «Молыжым ом пале», - вашештыш ӱдырамаш. Ик жап гыч Вячеслав Михайлович шке возен колтыш, мондалт пытыше изи годсо «Кече, лек» модышым ушештарыш. Тыге модаш изиж годым Изӱдыр лӱман ӱдырамаш (Эрик Минилбаевын коваже) туныктен.

Йоча-влак, погынен, Кечым сайлат. Чылан кругыш шогалыт, нуно Пыл лийыт. Покшелне - Кече. Йоча-влак йӱкын ойлат: «Кече, лек, кече, лек, ӱян мелнам пукшем, ваштар паньым пыштем, шоптыр (мӱян) чайым йӱктем». Мурен пытарымек, Кече сайлыме Пыл деке мечым (топым) шола. Тудо кучен огеш керт гын, модыш гыч лектеш, куча - очко. Тыге чылалан мечым кудалтен лектеш. Еҥ (Пыл) пытымеке, уэш модман. Кӧ кум гана кучен - Кече лиеш. Модыш умбакыже шуйна.

Теве тыге мемнан кугезына-влак Пылым пастыреныт. Мыят курык вуйышто тиде модыш дене модмынам шарнем. Топ олмеш ушкал кулап гыч ыштыме шарым кышкенна. Ала, изи годсым шарналтен, курык вуйыш модаш кӱзена?