Палыдыме поҥгым ида пого

Тыге ынже лий манын, пеш сайын палыме поҥгым гына погыман. Пырчат огыда коктелане гынат, коклан шкем тергаш уто огыл. А кузе тидым ышташ лиеш? Южгунам пелен поҥго сӱрет-влакым чумырымо атласым налаш темлат. Самырыкрак-влак, интернет сайын куча гын, смартфонысо приложенийыште улшо сӱрет-влак дене таҥастарен кертыт. Но кеч изи ойыртем уло гынат, тугай поҥгым налман огыл, молан манаш гын пӱртӱс лоҥгаште «ондалчык» поҥго-влакат ятыр вашлиялтыт. Тыге ошпоҥгым кӱжгывапка (сатанинский гриб, нарынчалге-сур тӱсан кочкаш йӧрыдымӧ), рывыжвоҥгым шоя рывыжвоҥго дене пулаштараш лиеш.

Кочмо да аяран поҥго-влак, мутлан, шляпашт, йолыштышт урвалте улмо, пластиныштын тӱсшӧ дене ойыртемалт кертыт. Шолтымо годым, аяран поҥго уло гын, лемыш пыштыме шоган йӱдалга, ший совла шемемеш манмыланат ӱшанаш огеш лий. Тиде чын огыл.  

Эше тыгай каҥашымат шотыш налза. Автомашина шуко кудалыштме корно, производственный предприятий воктен, оласе паркыште поҥгым ида пого - нуно шке кӧргышкышт неле металлым да моло аяран веществамат шыҥдарат. 

Ошпоҥгым, курезым, рыжыкым вигак ямдылаш лиеш, а молыжым - условно кочкаш лиймылан шотлалтше-влакым - мушкаш, вӱдыштӧ шинчыкташ але шолташ кӱлеш. Коштымо поҥгышто пайдале веществаже шукырак аралалт кодеш. А консервироватлышаш поҥгым пеш чот эрыктен мушман, уке гын мланде дене пырля кочкышыш ботулизмын возбудительже-влак логал кертыт, шижтара Роспотребнадзор.