Мер толкынын наградыжым кучыктеныт

Нунын коклаште Мишкан селасе йоча да самырык-влаклан туризм, экскурсий да патриотизм воспитанийым пуышо «Путник» рӱдерын «Спорт туризм» йоча ушемыштыже шуаралтше Егор Адышевымат палемденыт. Рвезылан наградым «Юнармия» элысе йоча мер толкынын Башкортостан Республикысе региональный мер штабшым вуйлатышын алмаштышыже Е.Р. Фахретдинова кучыктен. Торжественный мероприятийыш Егор пелен наставникше, «Путник» рӱдерын методистше Д.О. Алиева миен. 

Егор Адышев Башкортостан Республикын сборный командыштыже ече дене куржмо спорт туризмыште Марий Элыште эртыше Российын Первенствыштыже вийжым терген, тыгак шочмо-кушмо кундемыште спорт туризм, тунемше-влак коклаште эртарыме «Школа безопасности» республикысе таҥасымашлан призержо, районысо «Зарница» военно-патриотический модмашын сеҥышыже да призержо улеш, а эше патриотизм шӱлышан тӱрлӧ акцийыш чолган ушна. Егорым уло кумылын саламлена да ончыкыжат у сеҥымашыш шуаш тыланена!