Усталык шӱлышан еш

Ахтареевмыт шке еш пыжашыштым йӧратат да тудым тӱрлӧ семын сӧрастараш огыт ӧркане. Марийже чеп гыч каркасым ыштылеш, ватыже цемент дене тӱрлӧ фигурым келыштара. Капкам пурымаштак уна-влакым мультфильмысе пире вашлиеш, «Ты это, заходи если что» малдалеш. Умбалнырак чылт йомакысе гаяк Вувер кувам ужына. Тудлан чыве йолан изирак мотор пӧртым Саша чоҥен шогалтен. Беседке воктен пундыш ӱмбалне кужу почан павлин, а пеледыш коклаште гном-влак верланеныт.

Люба ты сомыллан ныл ий ончыч шӱмаҥын. «Икана интернетыште ик мастарын шовыч да цемент дене вазым ыштымыжым ужымат, «Мыят кертам вет»  манын шоналтышым да тӱҥал ончышым. Кертым вет. Икмыняр вазым «ненчылен» шындышым да эше мом ышташ лийме нерген шонкалаш тӱҥальым. Икымше персонажем йӧратыме мультфильмем гыч пире лие, - чон почын каласкала Люба. - А ынде мыйым чараш ок лий. Ванный ден малымверыште барельефым ыштышым. Толшо еҥ-влак тудым мый шке ыштымылан огытат ӱшане. Теве шукерте огыл Русалкым ыштен пытарышым. Ончыкыланат планем ятыр».

Тудо шуко пӧлеман пӧртыштын ик лукшым мастаргудыш савырен. Кастене, паша гыч («Сава» шыл комбинатыште тырша.) пӧртылмек, йӧратыме пашажлан пижеш.

Сашанат шке мастаргудыжо уло. Вахта-влак коклаште пу ӱзгар-влакым: пӱкеным, ӱстелым да молым - ыштылаш жапым муэш. «Иктаж-кӧлан пу арвер кӱлеш гын, ямдылен пуэн кертам. Тений шкаланна беседкым шогалтынем», - ойла Саша. 

Саша ден Любан суртышт кеҥежым оранжерейым ушештара. Шуко-шуко мотор пеледыш коклаште вате-марий икте-весыштым йӧратен, ваш полшен илат. Тыгай йӧн дене пайдаланен, мый нуным Жемчуг сӱанышт дене саламлем. У сеҥымашым, ешыштышт ваш умылымашым, кумда да кужу илыш корным, тазалыкым тыланем.