Ӱдыр-рвезым школыш колташ мыняр окса кӱлеш?

Эн ончычак йолчием кӱлеш. Туфльым налаш 1000 теҥге деч шагал огыл оксам луктын пыштыман, физкультурлан кроссовкым эн шулдыжым 900 теҥгеашым муын кертына. Ӱдыр-влаклан колготкым налаш 300-500 теҥге кӱлеш. 800 теҥгелан ош блузкым, тыгаяк акан юбкым да 1000 теҥгелан жилетым налаш гын, ӱдыр икшывылан школ формын акше 2600 теҥге лектеш. Блузка ден 800 теҥгеаш сарафаным налаш гын, 1600 теҥгем тӱлыман лиеш. Сарафаным, юбкым, блузкым тӱрлӧ аканым муаш лиеш, 2000 теҥгеаш келша, «кӱсенда кӱжгӧ» гын, пожалуйста, молан налаш огыл? Классыште йӱштырак гын, джемперым чийыде ок лий - тидлан 1000-1600 утла теҥгем луктын пыштыман. Рвезе-влаклан тувыр (рубашка) 600 гыч 1300 теҥге марте, жилет 600-1000 теҥгем, брюко 500-2200 теҥгем шогат. Ӱдыр-влаклан бант (200-500 теҥге), рвезе-влаклан тынарак акашан галстук да ремень (250-700 теҥге) кӱлыт. Физкультура уроклан ик тӱсан футболкым (300 теҥге гыч тӱҥалын) да триком (500 теҥге да шергырак) йодыт, уремышке чияш толстовкым але жакетым 700 теҥгелан налын кертына. Рюкзакым але ранецым эн шулдыжо 1400 теҥгелан муаш лиеш. 

Икымше классыш кайыше йочалан лӱмын ямдылыме пӧлек коробкым ончалына гын, тушто пластилин дене пашам ышташ оҥа, клей-карандаш, кок ручка, кок тыглай карандаш, точилке, пластилин, чиян карандаш, фломастер, вашкӱзӧ, ластик, акварель чия, альбом, вич шакмак да тынарак изи корнан тетрадь, чиян кагаз, блокнот да кисточка улыт. Тиде набор, мутлан, 1098 теҥгем шога. Тышке эше линейкым (наборжо 130 теҥгем шога), тетрадь ден учебник-влаклан ӱмбалым (обложкым) (300 теҥге), пеналым (250 теҥге) ешараш кӱлеш. Тиддеч посна паша тетрадь-влакым ача-ава шке налыт. Тидлан кокла шотышто 2000 теҥге кӱлеш. Тыгак алмаштен чияш нумалме йолчием мешакым (150-400 теҥге), курткым (1500-4000 теҥге) налаш гын,  чылаже ик икшывым школыш колташ эн шагалже латвич-латкуд тӱжем теҥге окса кӱлеш. Мутат уке, тунемме идалык мучко эше ятыр сатум угыч налман лиеш. Телылан шокшо вургем-йолчием, физкультур уроклан ече ден катаже гына мыняр теҥгем шогат? Нимат огыл, ойгыраш амал уке, шонем. Ӱдыр-рвезын вургемже тоштемеш але иземеш, тетрадь-ручкаже пыта - тугеже, тудо тунемеш, кушкеш, ончыко ошкылеш. Тидлан куаныман веле!