Пӱрымашлан ок ӧпкеле

Марзия икымше гыч нылымше класс марте Алман тӱҥалтыш школышто, визымше класс гыч Акпарс школышто шинчымашым поген. Кандаш классым пытарыме деч вара аваж ден ачаже ӱдырым Октябрьский олаш 4-ше ГПТУ-ш тунемаш колтеныт. «Тушто пукшат-чиктат, илаш тӱшкагудо уло. Штукатур-маляр профессийым налат гын, шкаланет илаш оксат лиеш», - манын ачаже. 

Кок ий тунеммек, Марзиян группыжым Уфашке практикыш колтеныт. Тушто И. Мечников лӱмеш медицина институтын корпусшо-влакым кӧргӧ велым штукатуритлен-шпаклеватлен, чиялтен коштыныт. Майыште Уфаштак экзаменым кученыт. Марзия кумшо разрядан штукатур-малярын дипломжым налын. Тушечынак пашаш распределитленыт, кажне бригадыш вич ӱдырым колтеныт. 1964 гыч 1969 ий марте Уфаште 4-ше чоҥымо управленийын кумшо трестыштыже штукатур-малярлан тыршен. Ик ий ыштыме деч вара 18 ияш ӱдырым «Коммунистический пашан ударникше» значок дене палемденыт. 1969 ийыште Шараныш пӧртылын, РСУ-ш пашаш тӱҥалын. (1970 ийыште РСУ-м РМСУ манаш тӱҥалыныт, а 1974 ий годсек Жилищно-коммунальный озанлыкын республикысе управленийжылан шотлалтеш.)

Пашаштак Марзия шке пӱрымашыжым вашлийын. Бикбай Асылбаевич Мавликаев, армий деч вара служитлен толшо самырык рвезе, Шаран села гычак лийын, тиде организацийыштак каменщиклан ыштен. Тыге марий калыкын кок шочшыжо вашлийыныт. Вашлийыныт да тиддеч вара ойырлен огытыл. Кок ий келшыме деч вара ешым чумыреныт.

Шараныште Марзия Тимирзяновна эре штукатур-маляр-влакын бригадирышт, 10-13 еҥлан вуйлык лийын. 1974 ий гыч тӱҥалын, 28 ий эре ик вере - «коммунхозышто» пашам ыштен. Тыршен ыштымыжлан пуымо Чап грамот ден таумутан серыш-влакым шотлен пытарашат ок лий. 2001 ийыште М.Т. Мавликаевам «Башкортостан Республикысе обслуживаний сферын сулло пашаеҥже» чап лӱм дене палемденыт. Тиде кугу наградым тудлан Муртаза Губайдуллович Рахимов кучыктен.

Ий-влак шижде эртен каеныт, ача-ава кок эргым кугемден шогалтеныт, пашам йӧраташ туныктен куштеныт. Кызыт нунат Шараныште илат, «Водоканалыште» пашам ыштат.

Марзия ден Бикбай Мавликаевмыт самырыкышт годсек эре стройкышто пашам ыштеныт. Уста штукатур ден ончыл бригадир нерген «Знамя октября» газетыштат моктен возеныт. Нунылан Шараныште кум пӧлеман пачерым пуэныт. 

Самырык ешлан посна пачер кугу пиал лийын. Но штукатурын пашаже куштылго огыл, чия, цемент да пурак ӱпшым шӱлен, Марзия чот кокыраш тӱҥалынат, врач-влак пу пӧртыш илаш куснаш темленыт. Тазалык - эн шерге поянлык, садлан Мавликаевмыт 1993 ийыште кугу пачерыштым кӱжгӧ пӱнчӧ пырня гыч чоҥымо пӧртлан вашталтеныт. Тудым ыштен пытараш кугем шушо эрге-влакат полшеныт. 43 ий пырля илыме деч вара Бикбай пелашыже ош тӱня дене чеверласен.

Марзия Тимирзяновнам коллективыштыже акленыт да пагаленыт. Тудын фотожо районысо Чап оҥаште кечен, кок созыв райсовет, сельсовет депутатлан сайленыт, таҥасымашлаште вийжым терген, шуко мер пашам намиен. Шке пашажым сайын палыше пашаеҥ илышыштыже куштылго корным кычалын огыл, кушко тудым пӱрымаш наҥгаен, тушто пашам ыштен. 

Марзия акай 2002 ий гыч сулен налме канышыште улеш. Кугу гына пакчаштыже пареҥгым да моло пакчасаскам ончен кушта. Кеҥежым бройлер чыве ден лудо-влакым ашна. Чодыраште емыжым, поҥгым погаш ок ӧркане. Чӱчкыдын Усолаш Мария шӱжарже деке полшаш коштеш. Тений 77 ийым темыше ӱдырамаш кызытат пӱсӧ уш-акылан да чолга улеш. «Пӱрымашемлан нимынярат ом ӧпкеле», - манеш тудо. Теве могай молодец улеш!