Марла книгам кушто налаш?

Тидыже мылам йӧршын у йӧнла чучо, вет тушто Марий книга савыктышын пытартыш ийлаште гына огыл, ожнырак савыктыме книгаже-влакымат муаш лиеш. Кевытысе темлымаш-влакым шергалын, марий йылме учебник, методический пособий, рушла-марла мутер-влакым, калыкнан искусствыжо, йӱлаже, мурымаш-куштымашыже, модышыжо, тӱржӧ да вургемже нерген книга ден сылнымутан произведений-влакым, а эше марий вургеман курчакым, икмыняр сувенирым да молымат верештым. 

Тыгодым лаштыклен шинчылташ ӧрканыман огыл улмаш: ик сатумак 700, 2400  але 3600 теҥгелан налаш темлен кертыт. Ончымем годым эн шулдо книгаже 144, а эн шергыже 8036 теҥгем шога ыле. Мо эше куандарыш: икшывылан тӱрлӧ йомак книгам шуко ужалат, шергынат огеш шого. Моло сатум заказатлыме годым (а кызыт шукын лач тыге наледат) марий книгамат корзинкаш «пыштыза» веле, конденат шуктат.