Ойлат, тамакым шупшдымо еҥын парняже чынак ок корж. Амалжым кӧ пала: ала кӱсенже нелылан, ала аярым нелдымылан?
Шупшшо еҥ молан дыр эре кокыра. Ялыштына кок Метрий иленыт, коктынат кокыреныт. Нуно пенсий налме еда вашлийыныт. Таза лийын, ончыкыжымат пенсийлан йывыртен илаш манын, налме оксаштым «шӱалтеныт».
Ик кечын кечывалым изи Метрий кугуж деке толын пурат, саламлалтын, вигак куан уверым ойлен пуа:
- Мый таче тамакым кудалтышым!
- Кузе туге кудалтышыч? - ӧрын йодеш кугу Метрий.
- Эрдене кокырен нойышымат, пӧртысӧ чыла тамакым: махоркет, самосадет, папиросет, сигаретет - коҥгаш йӱлатышым, ломыжыш савырнымыштым ончен, шкаланем мутым пуышым: «Мый тетла тамакым умшашкат ом нал!»
- Йӧра, пеш сай кудалтен кертмек. Но йӱлаташ ок кӱл ыле, мыйын тамакем пытен, келанен шупшам ыле, - чаманен каласыш кугуракше. - Тидым мушкаш кӱлеш ылят, пенсий марте арня уло. Йӧра, вучалтена, - окурко-влакым ястарен, коҥга ончылан шинчын, пӱтырен шупшын колтыш.
Ик жап гыч изиже мӧҥгыжӧ тарваныш. Тыге кок кече эртыш. Кумшешыжлан, эше волгалтынат шуын огыл ыле, пӧртыш йӱштӧ южым пуртен, изи Метрий пурен шогале да «Метрий абзый, тамакет уло гын, шупшыкто» манын, коҥга ончык миен шинче.
- Тый кудалтенат ыле вет, - аптыранен кугужо.
- «Кудалтенам» манаш гына куштылго, - тамак шикшым кӧргышкыжӧ налшыла вашештыш.
Тиде икымше гана «кудалтымыже», а тыгайже идалыклан кок-кум гана лиеден. Кажне гана, пӧртыштӧ могай гына тамак лийын, чыла коҥгаш йӱлатен.
Тыге мут пуаш, сӧраш веле куштылго. А тудым кучаш… Но изи Метрийым кеч кудалташ шонымыжлан жаплаш кӱлеш. Ӱмыржӧ кӱчык огеш лий гын, ала иктаж луымшо ганаже, тамакшым коҥгаш йӱлатен пытарен, шупшмыжымат кудалта ыле.