Республика вуйлатышылан предприятийыште лукмо ӱлыш кӱваран «КАМАЗ-4290» автобусым, вахтылан ыштыме «КАМАЗ-6250» автомобильым ончыктеныт. Радий Хабиров тысе уэмдыме пашам да заводын у разработкыжо-влакым кӱкшын аклен, нунын сай качестван, конкурентоспособный улмыштым палемден, Башкортостан Республика ден «КАМАЗ» ПАО коклаште умбакыже вашкылым вияҥдыме йодышымат каҥашеныт. Кугу проект-влак кокла гыч иктыже - Нефтекамск автозаводым модернизироватлымаш да идалыклан 3 тӱжем пассажир автобусым лукташ тӱҥалмаш. 2024 ийыште 2,3 тӱжем автобусым лукташ палемдыме.
Тыштак производствылан пашаеҥым ямдылыме йодышымат каҥашеныт. Автогигантын кум предприятийышкыже - Нефтекамск автозаводыш, Туймазасе автобетоновозым лукшо заводыш, Белебейысе «Автонормаль» заводыш 600 утла еҥым пашаш налнешт.
Радий Хабиров тыгак полимер смола-влакым лукшо «Аттика» компаний тӱшкаш, Бирск медколледжын Нефтекамск филиалышкыже, СВО-н участникше-влаклан да нунын ешыштлан полышым пуышо рӱдерыш миен, пакчазе-влаклан шке ончен куштымо пакчасаскаштым ужалаш ыштыме изи пазар-влакым ончал савырнен.