Шӱм-чон тазалыкым арален моштыман

Психика таза лийже манын, мом ыштыман? Научный шымлымаш-влак ончыктат: психический тазалыкым саемдаш вич ошкыл полшен кертеш: 

Вес еҥ-влак (родо-шочшо, йолташ, палыме, коллега) дене мутланыза;

Физически активный лийза. Шуко тарванылмаш кап-кыллан, организмлан веле огыл, психический тазалыкланат пайдале. Тыгай койышым илышыш кузе шыҥдараш? Физически активный лиймаш привычкыш савырнышаш. Тидлан чонлан келшыше занятийым муза, тиде куштымаш, йога, ошкылмаш лийын кертыт. Шкетын тарванылме олмеш моло-влакымат ушыза. Пӧлемыште да уремыште заниматлыза. Яндар южышто каналтен коштмашат - тарванылмаш. 

Эре улан тунемза. Мутлан, у кочкышым ямдылаш, пашаште у сомыллан тунемаш, самырык пашаеҥлан наставник лияш лиеш. Шке кид дене мом-гынат ямдылыза. 

Йырысе еҥ-влаклан полшыза. Изирак поро паша але благотворительность шкем сайын шижаш йӧным ыштат. Еҥлан полшен, те шкаландат  полшеда! 

Илышдам шижын илыза (тачысе кече дене илыза). Шонымашдалан, шижмашлан шукырак тӱткышым ойырыза. Тиде психический тазалыкым саемдаш полша.