Каракалпакстан дене вашкыл вияҥеш

Уна-влакым БР Правительствын Премьер-министрже Андрей Назаров вашлийын. Каракалпакстанын делегацийже кундемыштын инвестиций поянлыкше дене палдарен. Андрей Назаровын мутшо почеш, кок кундем кокласе товарооборот тений ныл тылзыште 63,5 процентлан ешаралтын. Тыгак апрельыште Башкортостан ден Каракалпакстан икте-весе коклаште вашкылым вияҥдыме нерген «дорожный картым» пеҥгыдемденыт. Тушко 9 направлений ден 24 мероприятийым пуртеныт. Тиде тусо Устюрский газохимический комплекс ден мемнан нефть да газ оборудованийын поставщикше-влак кокласе коопераций, Каракалпакстаныште пакчасаскам, пареҥгым да кечшудым куштымо шотышто проект-влак, школысо олимпиада, турист программа-влакым илышыш пырля шыҥдарымаш да молат, увертара БР Правительство.