Мастарлык конкурсышто сеҥышыш лектыныт

Конкурс Дюмеевский ялсоветыш пурышо «Маяк» озанлыкыште эртен. Латкум доярка коклаште, 80 гыч 79 баллым поген, неле таҥасымаште Вероника Таюшева сеҥышыш лектын. Осеменатор-влак коклаште, мастарлыкшым уэш пеҥгыдемден, 70 гыч 70 баллым поген, Радим Семенов ончыл верым айлен (Тыгай конкурсышто Радим Алексеевич икымше гана огыл сеҥыше лийын). 

Вероника тиде гана Илиш районышто «Лучший оператор машинного доения» лӱмым сулен, тудым икымше степенян диплом дене палемденыт. Вероника ден Денис пелашыже Красный Октябрь ялыште илат, верысе озанлыкыште тыршат. Кок ӱдырым да эргым куштат. Вероника шым ий дояркылан тырша. «Сеҥымашем шкаланем кугу пӧлек лие. Тиде конкурс таҥасымаш гына огыл, эше сайын ямдылыме пайрем. Пашанам тыге пагалымылан чонем куана, кумылем нӧлтеш, у сеҥымашыш шуаш ӱжеш. Озанлыкыште пашанам аклат да сай пашадарым тӱлат», - каласыш Вероника Борисовна. 

Мыланна, Октябрь ялысе калыклан, Вероника ден Радимын сеҥымашыштлан куанаш веле кодеш. Нунылан у сеҥымашым, тазалыкым тыланена.