Кызыт республикыште агрокомплекслан 2,5 тӱжем пашаеҥ кӱлеш. Ты пашаште самырык-влакым грант полшымо дене кучаш тыршат. 2023 ийыште 100 самырык специалистлан кажныжлан 750 тӱжем теҥге «подъемныйым» тӱленыт, агропромышленный комплексысе 106 предприятийлан 468 пашаеҥым ямдылаш 23 млн теҥгем пуэныт. Школлаште агрокласс-влакым почыт, тунемше-влаклан биологийым, химийым, растениеводствым, почвоведенийым келгынрак тунемаш да аграрный университетыш тунемаш пураш йӧным ыштат.
Чоҥымо отрасльыште 30 процент наре пашазе огеш сите, садлан вес кундемла ден элла гыч толшо-влакым пашаш налаш верештеш.
Кызыт «айтишник-влак» гына сай пашадарым налыт манме чын огыл. Пашазе-влакымат молгунамсе деч чотрак аклат. Квалификациян специалист-влак моткоч кӱлешан улыт, садлан сай пашадарым тӱлашат йӧным муыт. Токарь, фрезеровщик, кӱкшӧ разрядан слесарь-влак тылзеш 100 тӱжем теҥге деч шагал огыл налыт. ОДК-УМПО-што (авиационный двигатель-влакым лукшо оборонный предприятий) 4 разрядан пашазе-влак 90 тӱжем, 5 разрядан-влак 110 тӱжем, 6 разрядан-влак 125 тӱжем теҥге деч шукырак ыштен налыт.
Паша жап деч артыкрак да каныш кечылаште ыштымылан кок пачаш кугурак тариф дене, планым темымылан премийым тӱлат. Тыгай паша улмо годым еҥ-влаклан ӧрдыж кундемыште, еш деч тораште пашам кычал коштшаш уке.
ОДК-УМПО-н эше лу ий деч шагал огыл жаплан заказше сита, ойлат предприятийыште. Вес верла гыч пашаш мийыше-влаклан тӱшкагудышто илаш верым пуат але пачерым айлен илымылан тылзеш 13 тӱжем теҥге компенсацийым тӱлат. Кызыт оборонный предприятий шке пашаеҥже ден тунемшыже-влаклан пӧртым чоҥа. Тудо 2025 ий кеҥежым ямде лиеш. Ты пӧртыштӧ вигак илаш пураш ямде, мебель ден бытовой техникан 400 пачер лиеш. Илыме верым арендоватлыме акым УМПО тӱла.
Пашазе-влак кӱлмылан кӧра предприятий-влак шкаланышт шке кадрым ямдылынешт. Мыняр ияш улмым да тымарте кушто пашам ыштымым огыт ончо. УМПО-што Ростех кугыжаныш корпорацийын производственный да туныктымо рӱдержым почыныт. Тушто токарьлан, фрезеровщиклан, программа виктеман станок-влакын операторыштлан, шлифовщиклан, сверловщиклан да моло специальностьлан тугок тунемаш лиеш. Тунемше-влаклан тылзеш 38 тӱжем теҥге стипендийым тӱлат. Туныктымаште 70 процент жапшым практикылан ойырат.
Студент-влакат Российысе студент отряд-влакын программышт почеш пашазе профессийым налын кертыт. РФ-н Наука да кӱшыл образований министерствыже тений студент-влакым пашазе профессий-влаклан туныкташ республикылан субсидий семын 16 млн теҥгем ойырен. Ӱдыр-рвезе-влаклан шыжым тунемаш тӱҥалашышт 20 специальностьым ямдыленыт. Нуно вожатыйлан, ял озанлык техникым да оборудованийым ачалыше слесарьлан, бурильщикын полышкалышыжлан, сварщиклан, каменщиклан, стропальщиклан, арматурщиклан да моло специальностьлан тунем лектын да шкенан кундемыште, Крымыште, Краснодарыште, Алтай крайыште пашам ыштен але тӱнямбал вашкыл дене Белоруссийыш АЭС-ым чоҥаш, Китайыш, Турцийыш, Индийыш, Бангладешыш каен кертыт.
- Числовой программный виктеман станок-влаклан оператор
- программный виктеман станок ден манипулятор-влаклан наладчик
- токарь
- кумда профилян станочник
- фрезеровщик
- шлифовщик
- сверловщик
- механосборочный пашам шуктышо слесарь
Йодмашым umporabota.ru сайтыште возен кодаш лиеш.