Вер-шӧрым эрыктыме пагыт шуын

Ты кечылаште Еммет калыкат шке ялжым, пеҥгыде куштырам чумырымо верым эрыкташ лекте. Экологий десантым Нурей ялсовет вуйлатыше Олеся Атнагузина вуйлатыш. Ялысе староста Валентина Каюмова шӱкшак опташ лӱмынак мешак-влакым ямдылен ыле. 

Автомобиль кудалыштме корно воктенат шуко куштыра погынен. Ты йодышымат эре шинча ончылно кучаш логалеш, вет автомобиль кайыме жапыштак окна гыч кышкен кодымо пакет, кленча да кагаз мотор пӱртӱс сӱретым локтылыт гына огыл, экологийланат эҥгекым ыштат. Садлан корно тӱр-влакымат эрыктен лектыныт.

«Тыге пырля чумырген ыштыме пашан лектышыже куандара: ару урем ден кудывечылам ужын, чон куана. Тидым тыштак илыше еҥ-влак гына огыл, ялышкына толшо-влакат вигак шижыт. Субботникыш лекше-влаклан чылаштлан кугу тау! Кугурак-влак дене пырля тунемше-влак Арсений ден Евгений Каюмовмыт, Алан ден Илья Минькаевмыт, Егор ден Илья Атнагузинмыт, Илья Чанкаев кумылын тыршышт. Самырык тукым тыгай пашаш эше чулымынрак ушныжо ыле манын тыланыме шуэш, вет шке почешышт шке эрыктылыт гын, вес гана шӱкшакым кудалтыме деч ончыч шоналтат», - ойла Олеся Исламгалеевна.