Сӧрал корзиҥгам урга

Интернет тӱняште тӱрлӧ кидпашам шымлымыж годым тудо ургымо корзиҥга-влакын фотоштым ужын. Нуно куэм гыч пидмыла койыныт. Но тыгай атым йӧршын вес семын ыштат - ургат - улмаш. Альбина тидым варарак умылен. Оҥай техника келшен, да шкежат ойыртемалтше арверым ыштен ончаш кумылаҥын. Тудо корзиҥгам ямдылыме урок-влакым шымлаш тӱҥалын. Ик жап гыч ыштен ончен - пашаже воранен. Таче корзиҥгам ургымаш - тудын чонлан келшыше хоббиже.

Альбина тӱрлӧ тӱсан корзиҥгам трикотаж шнур гыч машина дене урга (ургымо пашалан самырыкше годымак шӱмаҥын). Келшыше материалым кушеч налашат муын. «Пашалан нимогай выкройка ден лекалым ом кучылт. Чыла фантазий вуйыштем. Корзиҥга могай кугытан лиймыже тудын пундашыжын диаметрже деч шога. Кӱжгӧ шнур гыч корзиҥгам веле огыл, эше пырдыжеш сакалаш сӧрастарыме панном ыштылам. Нуным утларакшым пӧлеклем, вет шке кид дене ямдылыме пӧлекыш кидмастар шӱм-чон моторлыкшым ешара. Ыштен пуаш йодшо-влакынат кумылыштым шукташ тыршем», - каласкала Альбина.

Кидпашалан шӱман ӱдырамаш Нефтекамск олаште шочын, ешым чумырымеке, ава-ачажын шочмо ялышкышт илаш куснен. Профессийже дене повар улеш. «Усталык шӱлышан айдемылан чылажат оҥай: иктаж ойыртемалтше идейым ужмеке, садак ыштен ончымо шуэш. Декоративный шнур гыч мый эше топиарийым, изи кожым ушештарыше сӧрал сувенир-влакым, панном ыштылам. Кидпаша илышыштем ойыртемалтше верым айла. Тудо илышыште лекше нелылыкым сеҥаш, шоныш деч каналташ полша, вийым ешара», - ойла сӧрал корзиҥгам ургышо кидмастар.