Ик ешла келшен илат

Тыглай ончалмаште, тиде еш моло деч нимо денат огеш ойыртемалт. Ваш пагален, йӧратен илыме суртышто ныл икшыве кушкын (Нунын рвезе жапыштлан тиде нормылан шотлалтын). Пенсийыш лекмешкыже, Василий наказанийым шуктымо федерал службышто (ФСИН) тыршен, прапорщик. Тамара Дӧртыльӧ оласе кӱртньӧ да бетон гыч арверым ыштыме заводышто (ЖЗБИ) пашам ыштен. Тамара ден Василий, ныл икшывым ончен куштен, шулдырыштым пеҥгыдемденыт, вийым пуэныт. Нуно таче вич уныкан кова-коча улыт. 

Вате-марий коктынат Красный Октябрь ялеш шочын-кушкыныт. Нунын кова-кочашт яллан негызым пыштыше лӱмлӧ, пагалыме айдеме лийыныт. Умурак - председатель, Иман - счетовод. Тамара ден Василий пагалыме кочаштын тукымыштым шуят. Василийлан ӱдыржӧ-влак «Ачай, фамилиет пыта, йомеш» манын огыт керт, вет нунын тукымыштым шуйышо Юра эргышт уло. Адакшым тудо ава-ачажлан пӧръеҥ уныкам пӧлеклен. Юрий, Карский теҥыз серыш вахта дене коштын, пашам ышта, сварщик улеш. Тугеже, Мимаев фамилий умбакыжат илаш тӱҥалеш. 

Тамара ден Василийын кум ӱдырыштат шке ешышт дене илат. Кугу ӱдырышт, Инна, ачажын корныж дене каен, ФСИН системыште тырша, прапорщик улеш. Пелашыже -  офицер, нуно пырля пашам ыштат. Кок икшывым куштат. Кугу эргышт шочмо элым аралыме профессийым ойырен налын, Саратов олаште Россий Федераций МВД-н военный институтшым тунем лектын. Тукымым шуя, ачаж велым кочаже полковник улеш. Алла продавщицылан тырша. Ешан. Пелашыже дизайнер улеш. Дӧртыльӧ олаште илат, ик икшывым куштат. Ача - ешын эҥертышыже. Кумшо ӱдырышт - Арина, Василий чӱчӱн ешыште эн изи ӱдыр. Тудат шке ешыж дене ила. Пелашыже дене пырля ик сомылым шуктат - изирак кевытым кучат. Ӱдырым куштат. Нунын шонымашышт - ава-ача семынак кугу ешан лийын илаш. 

Мимаевмыт ешыште келшымаш, пагалымаш шӱлыш эре ончылно лийыныт. Те СССР жапыште республика-влакын келшен илыме саманым ушештарыше ешым вашлийында мо? Мимаевмыт ешым «СССР-ын символжо» манаш лиеш. Тиде ешыште, икте-весым пагален, келшен, вич тӱрлӧ калык ила. Иннан пелашыже - татар калыкын эргыже, Аллан - удмурт рвезе, Юран ватыже - азербайджан калыкын шочшыжо. Аринан йӧратыме пелашыже, илыш эҥертышыже руш улеш. Тамара ден Василийын суртыш погынымеке, чылан уло калыклан умылаш лийме руш йылме дене мутланат. Пайрем ӱстел коклаште вич калыкынат мурышт йоҥга. 

Тыгай пайремыште коча музиканжым шупшылеш, тӱрлӧ семым луктын мурыкта, куштыкта. Василий - оҥай айдеме: сайын сӱретла, колым эҥыраш йӧрата, шке кидше дене изирак мебельым ыштылеш, пайремым оҥайын эртара. Тамара пакчасаскам кушта, пидаш кумылан. Коктынат пӱртӱсым йӧратат, тӱрлӧ верлам ужын коштыт. Унам сийлен, порын вашлийын ужатат. Уныка-влак эре кова-кочашт деке толаш кумылан улыт. Толын пурат да «Ковай, кочай, мый тольым!» кычкырен шижтарат. Тамара, Василий, пӧртда ончыкыжат йоча йӱк дене темже, таза лийза.