Выставкым ончаш мийыше-влакым Н.М. Давлетова каравай да чак-чак дене, О.Н. Дмитриев кугымӧр дене, П.Л. Соколов мӱй дене сийленыт. Калыкым районын инвестиций да туризм куатше дене палдареныт.
Землякышт дене вашлияш, шочмо районын илышыж нерген пален налаш Шаран районын кызыт Москваште да областьыште илыше шочшыжо-влакат миеныт. Южыштын калык вургемым чийымышт поснак чот кумылым нӧлталын.
Кок шагатат пеле шуйнышо пайрем программым Наратасты школ директор И.Н. Кучмухаметов устан вӱден. Погынышо-влак район нерген кином онченыт, тӱрлӧ викториныште вийыштым тергеныт, районын историйже дене кылдалтше йодыш-влаклан вашмутым кычалыныт. Сеҥыше-влаклан чак-чакым, банке мӱйым да мӧрым ямдыленыт. Андрей Соловьев ден Светлана Иванова пошкыртла, рушла, марла, татарла, чувашла ямле муро-влак дене куандареныт. Шаран районын площадкыж гыч иктат яра кид дене каен огыл, кажнылан шарнаш кодшо пӧлекым кучыктеныт. БСТ-н корреспондентше А.В. Андреева выставка нерген кином возен.
Тыгай кугу мероприятийыш миен коштмаш шаран-влаклан жапым пайдалын эртараш гына огыл, мемнан районна дене уло эл калыкым палдараш йӧным ыштен да поян опытым погаш, шукырак еҥым пален налаш полшен.