Элын президентшым сайлымаш нерген эксперт-влак мом ойлат?

Эртыше сайлымашлан Башкортостаныште эксперт-влак теве могай акым пуат. 

«Тиде йӱклымашыште уло элна икоян улмыжым ончыктыш. Элнан ончыкылыкшо, сеҥымашыже мемнан пашам пырля ушнен шуктымына В.В. Путин да тудын политикыж деч шогат. Ышташ шонымо пашанам илышыш шыҥдараш ончылно куд ий уло. Президентын Посланийыштыже йоҥгалтарыме чыла планым шуктен кертына манын ӱшанем. Ончылно сай паша-влак, сеҥымаш. 

Салтакна-влак гына мӧҥгышкышт таза-эсен пӧртылышт», - каласен Радий Хабиров. 

«Республика мучко йӱклымаш закон дене келшышын, тыныслын, шке радамже дене эртыш. Сайлымашлан мешаяш шонышо-влак лийыныт гынат, избирательный комиссий-влакын еҥышт, волонтер, правоохранительный орган пашаеҥ-влакын тӱткылыкыштлан кӧра нуным жапыштыже шекланен шуктымо да чактарыме», - палемден Россий ЦИК-ын еҥже Евгений Шевченко.

«Кызытсе Российын историйжым ончалаш гын, элыште сайлымаш годым нигунамат тыгай деструктивный вийын темдымыже шижалтын огыл. Тиде кечылаште ме президентым веле огыл сайлышна, кугыжанышын политикыжым умбакыже шуйымо - элын оборона шотышто вий-куатшым пеҥгыдемдыме, шкенан суверенный корнына дене вияҥме верч йӱклышна. Калык виян да эрыкан Россий, чын да стабильность верч йӱкшым пуыш», - ойла БР Кугыжаныш Собранийын - Курултайын председательже Константин Толкачев. 

Башкортостаныште эртыше сайлымашым Австрий, Шри-Ланка, Никарагуа да тӱнян моло эллаж гыч лу тӱнямбал наблюдатель эскерен. Нуно чыланат ужмыштым сайлан шотленыт. Молдова Республикын парламентшын депутатше Иванна Кёксалын мутшо гыч, тудо текшырыме участковый сайлыме комиссий-влакын пашаштышт нимогай экшык ден законым пудыртымашым верештын огыл. «Сайлымашлан чыла участкыште профессионально, сай кӱкшытыштӧ ямдылалтыныт. Тушто йӱклаш мийыше-влакым сай кумыл дене вашлийыт. Удан ужшо избиратель-влакланат тӱткышым ойырат, кугемдыше лупа-влакым пуат. Сайлаш мийыше самырык еҥ моткоч шуко. Кеч-могай жапыштат калык ок шагалем - чарныде йӱклаш мия», - каласен тудо.