Ӱярня вашеш. КОМАНМЕЛНА

Икымше рецепт

90 г  уржа ложаш, 100 г тыгыде шӱльӧ шӱраш (тыгыде «Геркулес»), 40 г  шӱльӧ ложаш, 180 г ӱмбал, 150 мл шӧр, 1 муно, 1 изи совла шинчал, 2 совла нӧшмӱй, ушкал ӱй кӱлыт.

Шӱльӧ шӱрашым, изиш шинчалтен, ӱмбалеш варен, 20-30 минутлан лӧчаш шындыман. Уржа ложаш, муно да шинчал гыч руашым нӧштылман. Руаш пешкыдырак лиеш гын, ик-кок совла леве вӱдым ешарыман. Руашым 20 минутлан пленкеш пӱтырал пыштыман. Тиде жапыште шӱльӧ руашым ямдылаш лиеш. Тидлан шӱльӧ ложашым, шӧрым, ӱмбалым, изиш шинчалым миксер дене лугыман.

Духовкым 200 градус марте ырыктен, салмаш пергаментым шарыман да нӧшмӱйым шӱрыман. Уржа руашым нылыте пӧлен, йытыр дене 3-4 мм кӱжгытан мелна-влакым ыштыман. Салмаш пыштен, духовкышто 3 - 4 минут кӱктыман.

Вара ямдылыме шӱльӧ руашым нылыте пӧлыман да икгай кӱжгыт дене мелна-влак ӱмбак шӱрыман, уэш 3 минутлан духовкыш шындыман. 

Луктын, кажне мелнаш шӱльӧ немырым шӱрен, уэш 3-5 минут  кӱэштман. Вара команмелнам лапка коркаш пыштен, ушкал ӱй дене ӱйлен, ӱстелыш шындат.

Кокымшо рецепт

Икымше комлан 240 г шыдаҥ (уржа) ложаш, 1 муно, 150-200 мл шӧр, чывыштыш шинчал, кокымшо комлан 40 г манный шӱраш (тыгыде шӱльо шӱраш), 120 г кефир (шовышо шӧр), 80 г ӱмбал, кумшо комлан 120 г шӱльӧ шӱраш, 200 г ӱмбал кӱлыт.

Ложаш, шӧр да шинчал гыч руашым лугыман. Салмам ырыктымек, руашым изиш пыштен, пеле кӱмеш гына кӱэштман. Тыгодым мелна йымал ынже эҥ, чеверген кӱжӧ манын эскерыман.

Мелна ӱмбак шӱльӧ ложаш, шовышо шӧр (кефир) да ӱмбал гыч ыштыме руашым шӱрыман. Петырен, духовкеш 2 минут кӱэштман. Кӱшыл велжым изиш пеҥгыдеммек, савырыман да уэш чевергымеш кӱктыман. 

Вара, савырен, шӱльӧ немырым шӱрыман да духовкеш кӱктыман. Ямде команмелнам ушкал ӱй дене ӱйлыман. Тудым шокшынек сгущенка денат кочкаш тамле. 

Тетрадешем возен кодымо рецепт

Икымше комлан 240 г уржа (шыдаҥ) ложаш, 1 муно, чывыштыш шинчал, кокымшо комлан 40 г шӱльӧ ложаш (манный шӱраш), 128 г шовышо шӧр (кефир), 80 г ӱмбал, кумшо комлан 120 г шӱльӧ шӱраш, 200 г ӱмбал кӱлыт.

Ложаш, шинчал да муно гыч шере руашым нӧштылман, йытыр дене 1,5-2 мм кӱжгытан мелнам ыштыман. Мелнаже кӱэштме ате деч кугурак гын, артыкшым пӱчман. Мелнам духовкеш изиш йошкартыман. Варажым кокымшо лончылан шӱльӧ ложаш (манный шӱраш), шовышо шӧр (кефир) да ӱмбал гыч ыштыме руашым шӱрен, духовкышто чевергымеш шинчыктыман. Кумшо пачашлан ӱмбалеш лӧчыктарыме шӱльӧ шӱрашым шӱрыман. Кӱктымек, ушкал ӱйым шӱралтыман. Кочкышда перкан лийже!