Икшывыштым пашалан туныктен куштат

Анжелика ден Иван Салимяновмыт Нефтекамскыште илат ыле. Анжелика Владимировна 36-шо йочасадыште воспитательлан ыштыш. Пелашыжын Йӱдвелыш вахте дене пашаш кайыме жапыште (Иван Ильич скважин-влакым олмыктышо «Евразия» компанийын Усинскысе филиалыштыже машинистлан ышта.) озаватылан тылзе дене, коронавирус пандемий пагытыште кум тылзе денат икшыве-влакым шкетланже ончаш верештын. Тыгодымак, паша деч кӱрылтде, Башкир кугыжаныш университетын Бирск филиалыштыже кӱшыл шинчымашым налын, мер пашаланат, «Шӱдыргорно» ансамбльыште мурашат жапым муын.

А вара Бирск районысо Реве ялыште суртым нальыч, кумшо ӱдырышт шочмек, кеҥежым тушто илышт. Ялыште икшывылан эрык - омсам почын лектат да кудывечыштат лият, йолташ-влак дене пырля мод, юарле веле. Садланак дыр, шыже шумек, кугурак икшыве-влакын олаш пӧртылмышт шуын огыл. Еш дене каҥашен налын, тушанак илаш кодаш да Игорь ден Даринам верысе школыш тунемаш пуаш шонен пыштеныт. Амалже дене Анжелика Владимировнамат школыш пашаш ӱжыныт. Вес идалыкшылан Салимяновмытын ешышт эше кугемын - ик эрган да кум ӱдыран ача-ава лийыныт. 

Ялыште, марий манмыла, йол пӱген шинчаш огеш лий. Пӧръеҥын, ӱдырамашын, икшывын ма - кажныжын шке сомылжо уло. Иван Ильичлан мончам, вӱтам чоҥаш кӱлын, йӧным муын, пӧръеҥ кидым йодшо моло сомылымат ворандарыман. Кугурак-влакым ончен, икшыве-влакат кертме семын тӱрлӧ ыштыш-кучышлан тунемыт. Ачажын ик тылзылан пашаш кайымыж годым 4-ше классыште тунемше Игорь вӱташте «озалана», вольыкым, чывым ончаш полша. 2-шо классыште тунемше Дарина пӧртыштӧ эрыктылеш, атышӧрым мушкеш, эше казамат лӱштен мошта. Кум ияш Мирра ден лу тылзаш Ариялан гына эше аваштын кид коклаш пураш эр. Тугат нунат ава помышышто нечкеланен киен огыт керт. Миррам аваже кажне кечын пошкудо Памаш ялыш йочасадыш кондыштара, а изи ӱдырым коваштлан, мӧҥгыштӧ улмыж годым ачажлан ончаш логалеш.

Тиде тунемме ийыште Анжелика Владимировна школ директорын воспитаний паша шотышто советникшылан ышта. Шуко тыршымашым йодшо школ паша деч посна верысе ялсоветын депутатше семын мер пашаланат пагытым муэш, школ коллективын ансамбльыштыже мура да тӱрлӧ мероприятийлаш коштеш…

Кузе чылажланат жапым муаш лиймым умылаш, очыни, Анжелика Владимировнан ӧткыр койыш-шоктышыжым палаш кӱлеш. Каласышашым каласа, шонен пыштымыжым ышташак тырша, иктаж-мом ышташ сӧрен гын, шӱдӧ процентлан ӱшанаш лиеш - ышта! Эше пеш мобильный - шкеак автомашинам виктара, кӱлеш верыш жапыштыже миен шуэш.

«Шкемым тугеак шынденам - ышташ кӱлеш, полшаш кӱлеш. Тыглай кечын тидын нерген омат шоналте, но вет тидланак илена. Тидыжак мемнам куандара да вий-куатым ешара», - иктешлыш мутланымашнам Анжелика Владимировна.

* * *

Тиде возымым лудын, коклаштыда «Эй, меат тыгай ик ешым веле огыл паленас!» маншат лектеш дыр. Да, тыгай кыртмен тыршышан еш ятыр уло. Нунын нерген «Чолманыш» возен колтеда гын, моло-влакат палаш да нунын дене кугешнаш тӱҥалыт.