Кугыжаныш полышлан эҥертен, пачерым налаш кузе оксам ситараш?

Ипотека программыш ушнашлан илыме верын акшын 20-30 процентшым тӱлыман. Мутлан, пачер 5 миллион теҥгем шога гын, тудым налаш кидыште 1-1,5 миллион теҥге окса лийшаш. Тидлан кредитым налаш йӧнан огыл, вет тугеже кредитымат, ипотекымат тӱлыман лиеш. Садлан еш бюджет гыч кажне тылзын тынар оксам тӱлен кертме шотышто ондак чыла сайын шонен-висыман. Тӱлаш ок лий гын, шке илыме вер нерген шонымашым йӧршын мондаш? Уке. Корным муаш лиеш. Тыгай годым первоначальный взнослан ситыше оксам чумырен шукташ жилищный строительный сбережений программа (ЖСС) полшен кертеш. 

Мо нерген тиде программа? 

Тыште тӱҥжӧ - еҥ-влаклан илыме верыштым саемдаш ситыше оксам чумыраш полшымаш. Те кум-куд ий банкысе счетышкыда оксам погеда, а кугыжаныш тидлан премийым тӱла. Тылеч вара льготный ставкан кредит дене илыме верым налаш лиеш. 

Программыш кӧ ушнен кертеш?

Ончыч программыш льготник-влак гына ушнен кертыныт гын, Башкортостан Вуйлык Радий Хабировын пунчалже почеш кугыжаныш полыш дене ынде моло-влакат пайдаланен кертыт. А кодший идалык мучашыште республикын Правительствыже премийын кугытшым 3 гыч 5 тӱжем теҥге марте ешарен.  Программыш Башкортостаныште илыше вуеш шушо еҥ ушнен кертеш. Проектлан шийвундым регионын бюджетше гыч ойырат, садлан илыме верым республикыштак налман. 

Погымо окса дене мом налаш лиеш?

• Пачерым але пачерыште пайым. Тудо у чоҥымо пӧртыштӧ але «вторичный» илыме верыште лийын кертеш. 
• Ямде пӧртым але таунхаусышто пачерым;
• Мланде участкым налаш, тыгак пӧртым чоҥаш кучылташ лиеш;
• Ончыч налме ипотекым тӱлаш лиеш. 

Программа кузе пашам ышта?

5. Программыш ушнаш жсс-рб.рф сайтыште але «Уралсиб» банкын пӧлкаштыже йодмашым кодыман.
6. Банкын вашмутшым вучыман. Тиде кок арня марте жапым налеш. Банкын йӧплымыж деч вара накопительный вкладым почаш лиеш.
7. Счетыш тылзе еда оксам оптыман. Эн шагалже - тылзылан 3000 теҥге. Шукыракат пышташ лиеш. Оксам кум-куд ий кажне тылзын опташ логалеш. Тыгак тендан вклад банкын идалыклан 1-1,5 процент кугытан ставкыжлан кӧра ешаралташ тӱҥалеш. 
8. Кугыжаныш деч премийым налыда. Тудо кажне тылзын пыштыме взносын 30 процентше кугытыш (тылзылан 5000 теҥге деч утларак лийын ок керт) шуэш. Премий шотеш кажне тылзын начисленийым ыштат, оксам вкладчикын счетышкыжо квартал еда колтат. Эн шагалже 3 тӱжем теҥге дене пыштен кертыда, тунам премият изирак лиеш. Кугыжаныш деч эн шуко - 5000 теҥге - премийым налашлан тылзе еда 16 670 теҥгем пыштыман (шукыракат лиеш, но премий тугаяк, 5000 теҥге, кодеш). 16 670 теҥгем пыштен, куд ийыште 1 миллион 560 тӱжем теҥге оксам поген шуктеда, тушеч 360 тӱжем теҥгеже - премий. Вкладыш оксам колтымым чарнеда але погымо оксам тушеч жап шуде налыда гын, премийжым бюджетыш пӧртылташ логалеш.  
9. Вкладын жапше мучашке шумеке, чумырымо оксам (премий дене пырля) илыме верым але мландым налаш, пӧртым чоҥаш кучылтыда. Тыгак 5,5-7 идалыкаш процент дене «Уралсиб» банкыште але, условийын йодмашыжлан келшен толыда гын, вес банкыште вес тӱрлӧ ипотекым налын кертыда. 
10. Жилстройсбережений программыш ушнышо-влаклан льготный ипотека эн шукыжо 1,5 миллион теҥгеш шуэш. Ипотекым тӱлымӧ жап накопленийым погымо жап деч 1,5 гана кужурак. Тиде окса ок сите гын, банк рынкысе условий дене ешартыш оксам пуэн кертеш.

МУТЛАН: 

Вич ийыште 1,5 миллион теҥге оксам поген шукташ кӱлеш. 

Тидлан тылзе еда вкладыш 20 тӱжем теҥге дене чумырен мийыман.

Тыге вич ийыште 1,2 миллион теҥге шкендан оксадам чумыреда, тыгак кугыжаныш деч премий шотеш 300 тӱжем теҥге оксам налыда.   

(Тиде шотлымым справочный увер семын гына ончыктымо.)

Оксам вич ий погымеке, тудым кугыжаныш премий дене пырля вич тӱшкаш пурышо участник (бюджетник, 35 ийыш шудымо самырык еш, 60 ий деч кугурак пӧръеҥ, вуеш шудымо икшыве-влакын ава-ачашт, 55 ий деч кугурак ӱдырамаш, 1-ше, 2-шо, 3-шо группа инвалидностян еҥ-влак) накопленийым вес кӱлешан сомыллан кучылташ налын кертеш. 

Февральыште жилстройсбережений программылан лу ий темеш. Тиде жапыште программа полшымо дене республикыште вич тӱжем наре еҥ илыме верлан оксам поген шуктен, пӧртым чоҥен, квадрат метржым кугемден. Кызыт Башкирийыште 3,5 тӱжем еҥ, программыш ушнен, илыме верлан оксам пога».