Ме чыланат йоча лийынна

Ужар пурсам кочмо жап. Кызыт ныл-вич еҥ машина дене пасу тӱрыш миен чарнатат, икшывышт дене пырля волен, покшекрак тошкен, шеҥын пурат. Огыт вашке гын, ондак теммеш кочкыт, вара пакетыштым темат. Вашкат гын, шудыжге кӱрын, багажникыш шӱшкыт. Корнышкат огыт ончо, огытат шеклане, эркынлен тошкат, кӱрыт. Кушто тыште романтика? Шоҥгемат гын, руш манмыла, илышет гыч мом оҥайым шарналтет? Йокрок вет! Тулойыпшо уке.

А ынде мемнан йоча жапым шарналтена. Пурсалан мийымашым «Неуловимые мстители» кино дене таҥастараш лиеш. Пасуш велосипед денат огыл, йолын миенна. Да эше кунам шонет, тунам огы-ы-ыл. Амалже - пасу орол. Тудо осал лийын, кидыштыже - эре сола. Шкеже куржын ок керт, олмешыже сола мучаш «покта». Пасум тошкыман огыл. А йоча тидым шона мо? Тӱҥжӧ - пурсам теммеш кочкаш да орол деч шылын утлаш. Кажнын тиде жап дене кылдалтше историйже уло, очыни. Мыят иктыжым тыланда ойлынем. 

...Кӱтӱ пӧртылмеке, ял уремыште кастене йоча-влак модаш чумыргат. «Пурса калта кӱжгемаш тӱҥалын, айда пасуш. Тушто ынде оролат уке», - ойым пуыш ала-кудыжо. Тыге чылан рӱж пурса пасу декыла ошкыльыч. Тунам капыште сатин шалавар, эҥырашыже резинка дене кылдалтын, шаларак тувыр - икманаш, чылажат пурсам кӱрын опташ келшен толын. Погена... Йолаш эҥыраш пурса дене темын оварен, южын мӱшкыр «кугемын». Кенета ала-кӧ вуйым нӧлтале да «Атас! Орол!» кычкырале. Чынак, корно дене имнешке кудал толеш. Чыланат шорык кӱтӱ семын корно дене тумер мучашке рӱж куржыч. Йӧра, тудыжо кеч мӱндыр огыл. Миен шумеш, иктаж-кӧн пурсаже кодын гын? Ала… Теве, шӱшкен-шӱшкен, имнешке эртен кудале. «Кӧ ыле, орол мо?» - шӱлешт-шӱлешт йодыт чылан. Ала мемнам иктат ужын шуктен огыл? Ял уремыш пурышна. Ужам, капка ончылно мемнам поктышо имне шога. Лӱдынрак пӧртыш пурышым. А тушто… Ветврач ачамлан мемнам кузе лӱдыктымыж нерген воштыл-воштыл каласкала! 

Тыгайже шуэн лийын, конешне. Ава-ачана мемнам, самырык-влакым, шурным куштышо еҥын пашажым пагалаш туныктеныт. А кызыт… Шкеат огыт пагале, икшывымат огыт туныкто. Романтикыжат уке.

Але мый йоҥылыш лиям? Вет илыш кызыт вес тӱрлӧ. Тугеже, йоча-шамычат мемнан жапысе гай огытыл. Нуно ужар пурсалан коштмаште нимогай романтикым огыт уж. Романтикым нуно йӧршеш вес семын ужыт. Ала-мо весе, мыланна палыдыме… Тӱҥжӧ - таза-эсен лийышт.