Шкет ава-ачам паша вер деч посна кодаш ок лий

Паша кодексыш пуртымо вашталтыш дене келшышын, 16 ийым темыдыме икшывым шкетын куштышо ава-ачам паша вер деч посна кодаш ок лий. Исключений семын организацийын ликвидацийыш логалмыже але паша обязанностьым пудыртымаш, тыгак кӱлешан амал деч посна паша обязанностьым икана огыл шуктыдымаш лийын кертыт. «16 ийым темыдыме икшыве-влаклан полыш але кӱлеш. Тыгай ситуацийыште, кунам ава икшывым шкетын кушта, тудым паша деч кораҥдымаш ешым илашлан окса деч посна коден кертеш. Ме шкет ава-ача-влакым аралышаш улына, пашаште вуйлатыше-влакат ответственностьыштым умылышаш улыт», - каласен РФ Кугыжаныш Думын председательже Вячеслав Володин.