Контрактник-влаклан кузе полшат?

Окса полыш

Специальный военный операций кайыме годым оборона министерство дене контрактым ыштымылан кажне сарзе кугыжаныш деч вигак 195 тӱжем  теҥге единовременный пособийым налеш. Республикым вуйлатыше Р. Хабировын указше дене 2023 ий 10 ноябрь деч вара контрактым серыше але мобилизацийыш логалше еҥлан регион 100 тӱжем  теҥге ешартыш оксам тӱла.

- Идалык ончыч мобилизацийыш логалше, кызыт шке кумылын контрактым возаш келшыше пӧръеҥ-влаклан тиде ешартыш полыш лиеш, - палемда Башкирийын военный комиссарже М. Блажевич. - Призыв почеш службым эртышаш рвезе-влакат контракт йӧн дене служитлаш каен кертыт. Тыгай ошкылым шукыж годым илыш опытым погышо, университетым пытарыше але отсрочкым налше рвезе-влак ыштат. нуно кум-ныл тылзе тунемыт, вара СВО-што гына огыл, моло воинский частьыштат служитлен кертыт. Рвезе-влакым кумылаҥдаш республика ешартыш окса полышым ышта.

Район ден ола-влак полшат

Контрактник-влаклан окса дене ола ден район-влакат полшат. Мутлан, Уфаште Олам вияҥдыше общественный фондын меценатше-влак 100 тӱжем ешартыш единовременный окса полышым пуат. Тудым 2023 ий 23 октябрь гыч 15 ноябрь марте Уфаште РФ Вооруженный вий дене контрактым подписатлыше-влак налын кертыт. Контрактым серыме деч вара кок кече гыч окса счётыш пура. 

Оксам налме шотышто СВО-н участникше-влаклан полышым пуышо рӱдерыште Уфаште (Октябрь проспект, 85) (347) 215-15-70, (347) 215-16-70 телефон дене, тыгак 177 единый справочный номер дене, 122 але (347)218-19-19 Ситуационный рӱдерыш йыҥгыртен, тыгак «Мои документы» МФЦ офисыште умылаш лиеш.

Тыге, оборона министерствын ик гана тӱлымӧ (195 тӱжем теҥге), Уфа меценат-влакын пуымо (100 тӱжем теҥге) да регионын пуымо оксам (100 тӱжем теҥге) шотлаш гын, контрактым возышо еҥ СВО-ш кайыме деч ончыч иканаште 400 тӱжем наре теҥгем налын кертеш.

Вара военный спецоперацийыште пашадар тылзылан эн шагалже 210 тӱжем теҥге лиеш. Наступатель еҥ ончык кайымылан, штурмовой отряд дене сеҥен налме кажне километр корнылан, танкым налмылан ешартыш оксам тӱлат.

Оксам кушко колтат?

Тылзаш оксам контрактникын ончыктымо кеч-могай банкын счётышкыжо колтат. Тудо «Мир» карт дене кылдыме лийшаш. Счётын реквизитшым контракт почеш военный службыш налме пунктышто ончыктыман. Контрактникын «Мир» картыже уке гын, тудлан банкыште счётым почыт. Регион деч моло оксамат тиде счётыш колтат.

Ешлан полыш

Контрактым серышын лишыл еҥже-влаклан пум ямдылаш, ачалыме сомылым шукташ полшат, йоча-влакым школышто тугок пукшат, нуно кружоклан, секцийлан, колледжыш тунемаш пурымо годым оксам огыт тӱлӧ. Йочасадыш черет деч посна логалыт да тугок коштыт. СВО-н участникшат, ешыжат республикын санаторийлаштыже тазалыкыштым тӧрлен кертыт. 

Пӧртыш газым пурташ кӱлеш гын, 100 тӱжем теҥге деч шагал огыл акан сертификатым пуат. Россий Герой лӱмым нумалше але спецоперацийыште ойыртемалтше участник-влаклан пӧртлан мландым пуаш тӱҥалыт. Тыгай закон ноябрь мучаште лекшаш. 

Ӱдырамаш-влак контрактым серен кертыт мо?

Ӱдырамаш-влакымат контракт дене службыш налыт.

Куюргаза район гыч шуко икшыван ӱдырамаш контракт дене СВО-ш поварлан каен. Район вуйлатыше Ю. Ильясовын палемдымыж почеш, тудын икшывыже-влакым ковашт онча. 

Кӧ сарзе радамыш ушнен кертеш?

Контракт почеш служитлаш запасыште улшо 60 ияш марте пӧръеҥ-влакым налыт (чӱдӧ специальность дене - 65 ияш марте), тыгак кӱшыл але кокла профессиональный шинчымашым налше, армийыште лийдыме рвезе-влакым налыт.

Мыняр жаплан контрактым сераш лиеш?

- Рядовой гыч прапорщик марте - куд тылзе деч шагал огыл сроклан;

- офицер-влаклан - кумыт гыч вич ий марте.