31 май - Тамак деч посна илыме кече

Статистикылан ӱшанаш гын, тӱняште тамакым эреак кучылтшо миллиард наре еҥ шотлалтеш. Никотин айдемын организмжылан кугу эҥгекым конда. Тамак шикшыште 3000 тӱрлӧ вещества уло. 20 сигаретыште (тамакым шупшшо еҥын кокла нормыжо) 130 мг никотин шотлалтеш. Тылеч посна тушто цианид, мышьяк, синильный кислота, угарный газ да моло аяр улыт. 

Тамакым шупшшо-влакын шӱлыш корнышт гыч 81 кг тегыт эрта, тудын ужашыже шодеш шинчеш. Кече еда тӱжем наре илышым наҥгая, 90 процент утла еҥже шодо чер дене орлана. Ик сигаретым шупшмек, айдемын давленийже нӧлталалтеш, вӱргорно аҥысыремеш. Шупшшо еҥын реакцийже эркышна, никотин тӱжвал тӱсым молемда, вашкерак шоҥгемдыкта. Мӱшкыран ӱдырамаш-влакын йочашт-влак жап шуде шочыт. Тамаклан кӧра пожар-влакат лийыт. Тудо шупшшо еҥын тазалыкшылан веле огыл, тыгак ешыжланат эҥгекым конда. Йыгыре улшо еҥ-влак эреак шикшым ӱпшынчыт. Тидлан кӧра вуй пӧрдеш, укшинчыкта, кокырыкта, шинча ден логарым чыгылта, аллергий приступ лийын кертеш. 

Тамак шупшмо деч утлынеда гын, тидлан лач иктым умылыман: сигарет-влак илышыште нимо сайымат огыт кондо. Шке илышым уэмдаш, тӱжвал тӱсым, тазалыкым саемдаш, осал койыш дене кучедалаш моткоч сай амал уло.