Энна ИГНАЕВА, Бирск ола, 9-ше школ:
«Мый школ книгагудышто пашам ыштем, садлан шукыжым тӱҥалтыш да кугурак класслаште тунемше-влак книгалан коштыт. Тӱҥалтыш класс утларакшым шонымо почеш, К. Чуковскийын, С. Маршакын, Э. Успенскийын, В. Драгунскийын книгаштым лудыт. Йомакым, вольык, пӱртӱс нерген книгам, а кугурак класс - программе почеш, мом урокышто лудаш пуат, тудым налыт».
Инна АПЕКОВА, Мишкан район:
«Школышто тунеммына годым, урок пытымеке, уло класс дене книгагудыш куржына, книга деч посна кодына манын, икте-весым шӱкен-шӱкен пурена ыле. А книгам кондымо годым мо нерген лудмым каласкалаш йодыныт, садлан вуеш пыштен лудаш тӧченна. Книгам кучен, тудым лаштыклен лудат гын, вуешат сай кодеш, а кызыт интернет улмылан кӧра калык шукыжым тушто шинча, кӱлеш книгамат туштак лудыт, шонем. Кызыт икмыняр еҥ гына книгалан коштеш».
Эльмира БАСЫРОВА, Нефтекамск ола, рӱдӧ книгагудо:
«Ожно еҥат книгагудыш шуко коштеш ыле, кызыт гына илыш ончыко кайымылан шагал толыт. Илалше-влак ожсо илыш нерген книгам налыт, ӱдырамаш-влак мелодрамым, а самырык ӱдыр-рвезе детектив нерген лудаш йӧратат».
Нунын дене мутланымеке, тыгай шонкалымаш лектеш. Кызыт илышым интернет саман авалтен. Иктаж-мом палынет, луднет але кочкаш шолтынет гын, чыла тушто муаш лиеш. Илен-толын, книгагудын кӱлешлыкше шеҥгелан кодеш.