А саде кÿм, лач кудыж дене
Капкас ÿмбач темдал шындат
Шинчалтыме кияр-поҥгетым,
Да ковыштам тений адак.
…Лÿшкат йыр
«Кёрлинг, кёрлинг!»
Ынде Олимп модмаште -
тудын чап.
Йыргешке тыртыш -
порсын кинде
У сеҥымаш дек утыр чак!
Эше тыгайым,
вес йомартлым
Вашлийме кушто - йытырам?
Чын, ий ÿмбалсе «ия» марте
Мемнан кÿланже ой, тора!
Но поҥгым але ковыштам ма
Тамлаш, нöреп гыч луктын,
сай!
Ешаренат эн тутло тамым
Шкежат тыш пуйто, Кÿ Изай.
Шуарыме дыр вий-куатым
Акрет вÿд помышеш, чынак!
Ала метеоритын катыш -
Торасе шÿдыр гыч уна?
Вара тый муынат шке верым
Мемнан суртнаште икана.
Миллион ийламак
толмо шерын!
Мылам гын чылт талешкына.