Мардеж пуал колта гынат, кече шыратен ончалмыже, ырыктымыж дене кумылым нӧлта. Чодыраште, садыште пӱртӱс ылыжмылан йывыртен чогыматыше кайыквусын йӱкланымыжым колын, шӱм-чон кана. Чынжымак шошо пайрем!
Шошо толмылан куаныме дене пырля айдемылан сомылат ешаралтеш. Майыште уремнам, кудывечынам, эҥер серлам - икманаш, илыме вернам куштыра деч эрыктен, тӱзландарен шуктыман. Сад-пакчаште топланыше мландат у тургымлан ямде: озажын кӱлеш кушкылым ӱдымыжым, шындымыжым вуча. Пакчасаскам шындыме сомыл чыла жапыштыже да шот дене ыштылмым йӧрата. Пасулаште шурным куштымо нергенат тыгак каласаш лиеш. Садлан мланде пашаеҥ-влак, игечын койышыжым шотыш налын, шукертак шошо ага тургымым тӱҥалыныт.
Тек шошо чылалан куаным, татулыкым да тыныс илышым пӧлекла!