Сергей Масаев (Краснокам район): «Вахта дене ышташ нимо сайжат уке, шонем. Илыш йодмо почеш каенам да 34 ий ыштышым, ӱмыр эртымымат шым шиж. Пенсийыш лекмеке веле Йӱдвелыш коштмым чарнышым. Но кызыт мӧҥгыштӧ шинчымаш уке, Краснокам райбольницыште пашам ыштем. Ончыч икшыве-влакым кугемдаш кӱлын гын, кызыт чон йодмо почеш пашаш коштам».
Тимур Дигитаев (Бирск ола): «Йӱдвелне мый 30 ий ыштем. Вахта ден ышташ келша, молан манаш гын ик тылзе ыштет, вес тылзе канет. Эрдене пашаш кайыме ок кӱл. Пелашемым паша верышкыже намиен кодем да кечыгут сурт сомылым ворандарем».
Владимир Владимиров (Мишкан район): «Мый Йӱдвелне 7 ий ыштем. Илыме верыштем паша лиеш гын, нигушкат ом кай, ешем пелен лиям ыле. Вахта дене ыштымаште сайжак уке: тазалык пыта, икшыве-влакын кугеммыштым от уж. Южгунамже нунын шочмо кече пайремыштыштат лияш ок логал. А каныме годым утларак еш пелен лияш шонем, пелашемым кандарем: йоча-влакым йочасадыш наҥгаем, налаш мием, игече сай годым паркыште коштына».
Олег Байрамов (Нефтекамск ола): «Вахта дене ыштымашын сайжат, удажат уло. Теве ынде 12 ий Йӱдвелыш коштам. Сайже - ик тылзе ыштет гын, вес тылзе мӧҥгыштӧ улат. Самолет дене коштмо годым корнылан шуко жап ок кай, билетым налын пуат. Мӧҥгыштӧ канем манаш огеш лий, молан манаш гын тыштат паша лектынак шога, но еш пелен вуй кана, ӱдырем-влак куандарат.
Уда могырым ончалаш гын, эн тӱҥжӧ - тазалык пыта. Южгунам малыдеат пашам ыштет, кажне пашан шке йӧсылыкшӧ уло. Йӧсӧ манын, мӧҥгыштӧ от шинче. Илыш куштылго лиеш гын, чылан шке олаштышт але ялыштышт пашам ыштат ыле. Пашам кычалме годым ондак оксам кузе тӱлымышт нерген йодыш лектеш. Ончыч ачана-влак Йӱдвелне ыштыме годым шуко тӱленыт, очыни, но кызыт туге манаш ок лий. Ик тылзе пашаште улат гын, весе - мӧҥгыштӧ. Пӧртыштӧ кийымылан иктат оксам ок тӱлӧ, адакшым ешым ончымо годым сайын чийыме, тазалыклан пайдале кочкышым налме шуэш. Икшыве-влак кушкыт, нуным йол ӱмбак шогалташ кӱлеш. Садлан вахта гыч мӧҥгышкӧ толмеке, иктаж 3-5 кече канем да шке олаштем пашаш лектам. Илыме верыштак паша лиеш гын, ешым коден, пӧръеҥ-влак Йӱдвелыш шумеш коштыт ыле мо? Пырля пашам ыштыме годым ик узбек деч (нунат мемнан деке пашаш коштыт.) мӧҥгышкыжӧ кунам пӧртылшашыж нерген йодым. «Шуко кодын огыл, пел ий гына, ноябрь тылзыште ешем ужам», - вашештыш тудо.
Владимир Васильев (Бирск район): «Мый вахта дене ынде 25 ий утла ыштем. Кушто гына коштын омыл: Ханты-Мансийский, Ямало-Ненецкий, Коми кундемлаштат, шокшо эллаштат лийынам. Икте сай - пашадарым сайын тӱлат. А удаже - эртак йӱштӧ, ночко, тазалыклан сай огыл. Икшывем-влак кугемыныт, а кӧн эше изи улыт, нунылан, вахтыш коштын, пашам ышташ йӧсырак, шонем.
Нуным колыштмек, вахта дене пашам ыштыше-влаклан чытышым, тазалыкым да ешыште умылымашым тыланыме шуэш, вет икте-весым умылен, ваш-ваш эҥертен веле шке илыш корным чонлан келшышын виктараш лиеш.