Пысман корем

Мемнан Пошкырт кундемыште Шопкер ялна курык-влак коклаште верланен. Ял воктенсе курыкын лÿмжö -  Сÿли курык. Ожно тушто Сÿли ешыж дене илен, шкеже кугыжан армийыште сотниклан (ротын командирже) служитлен улмаш. Курык мучашыште, эрвел могырно, изирак корем уло - тудым ме Карман корем манына. 

Ик спектакльыште марий ял воктенсе Пысман корем нерген ушештарат. А вет мемнан велнат, ялна деч мÿндырнӧ огыл, Пысман корем уло! Кум келге корем, чодыра кокла гыч лектын, ик вере ушнат. Памашыжат уло. Тиде корем пошкудо татар ял воктене верланен. Татар-влак тудым Тимофеевка маныт. Ынде тиде верыш южгунам гына сонарыш коштына. Тушто ош, чувар мераҥ-влак илат. Рывыжшат лиеда, вет коремже чодыра воктенак. Вес серыштыже пасу тÿҥалеш. Пысман корем Тымбай могырнат, Кÿрзе велнат уло. А Караидель районысо Ямбатыр ял воктен Межа корем верланен. Пысман мом ончыкта? Тиде межа, вес семынже граница. Ожно ял ден ял коклаште кÿтÿ коштмо верым, пасулам да тулеч молым ойырымо межа лийын. 

Овда нерген мемнан денат легенда-влак шарленыт. А эше пÿртÿсыштö овда кайык ила. Поснак кастене шкет кодшо еҥым лÿдыкташ йöрата. Тиде кайыкым рушла воробьиный сыч маныт, шонем. Тудын нерген «Охота и охотничье хозяйство» журналыште лудынам. Историйыште, илышыште тӱрлӧ кундемысе тыгай икгайлык-влак вашлиялтыт улмаш.