СВО-што улшо-влакын ешыштлан Башкирийыште кузе полшат?

Икшыве-влаклан

Сарзыеҥ-влакын 1,5 ийым темыше икшывыштлан йочасадыште верым черет деч посна пуышаш, а кугурак-влаклан лишыл школыш кошташ йӧным ыштышаш улыт. Ешышт йочасадлан, йочам школыш каяш ямдылымылан, продленный тӱшкаш да кружокыш коштмылан тӱлышаш огыл. Икымше-лат-икымше класслаште тунемше-влакым шокшо кочкыш дене тугок пукшыман, медицина показаний улмо годым «Шӧр кухньын» кочкышыжым, тазалыкым саемдыме йоча лагерьлаш путевкым, общественный транспорт дене коштмо картым тугок пуат.  

Школым пытарыше ӱдыр-рвезе-влак колледжлаште бюджет кӱшеш тунемыт, тунеммыштлан тӱлен шуктеныт гын, оксаштым мӧҥгеш пӧртылтат. Колледжлаште сарзыеҥ-влакын икшывыштым тугок пукшат, колледжлаште да вузлаште тунемше-влаклан тӱшкагудышто верым пуышаш улыт.

Ешлан

Специальный военный операцийыште лийше-влаклан да нунын ешыштлан ятыр йӧн ышталтын. Нунын санаторийлаш тугок канаш каяш йӧнышт уло, 2022 ийлан ик автомашиналан транспорт налогым, шӱкшакым шупшыктымо акым огыт тӱлӧ. Пӧртышкышт газым пурташ сертификатым налын, «Жилстройсбережений» программыш льгото йӧн дене ушнен, Башкирийысе илыме верым чоҥымым вияҥдыме фонд деч пачерым рынке ак деч шулдынрак налын кертыт. 

СВО-што улшо-влакын ешыштлан озанлыкысе сомылым ворандарен колташат (кудывечым эрыкташ, пум, шудым кондаш да молылан) полшат. Шаймуратов лӱмеш Волонтер штабын колл-рӱдерышкыже 8-800-201-89-03 номеран телефон дене 9 гыч 18 шагат марте йыҥгырташ лиеш. Тудын пӧлкаже-влак район ден олалаште «Единый Российын» офисше-влак пелен пашам ыштат. Тыгак верлаште «Еш» службышто (8 гыч 20 шагат марте) документым погаш, судыш заявленийым возаш, банклан але пристав-влаклан документым ямдылаш полшат. Аважлан трук эмлалташ каяш кӱлеш гын, икшывыжым социальный приютеш вераҥден кертыт. Ешыште иктаж-кӧжӧ пашаш пурынеже але сайракым верештнеже, илалше але инвалид-влаклан соцпашаеҥын полышыжо кӱлеш гынат, полшаш тыршат. Тыгодым ешын кугытшым да парышыжым шотыш огыт нал.