Пакчам да садвечым у кушкыллан ямдылена

Шуко озавате пакчасе пушеҥгыжым идалыклан кок гана чиялта: шыжым -  пушеҥге тӱҥ теле йӱштыштӧ ынже шел манын, шошым - март але апрель тылзыште профилактике семын. Тидлан утларакшым известьым але мелым кучылтыт. Пушеҥгым чиялташ сай вартышым ойырен налман. Тыгайым кевытыштат налаш лиеш. Нуно известь, купорос да клей гыч ышталтыныт. Известь кече деч, купорос тӱрлӧ чер, инфекций да бактерий деч аралат, а клей пушеҥгеш сайын пижыкта.

Шыжым лум йымалан кодшо лышташлам шорвондо дене удырен погыман. 

Шоптыр да пуншоптырын укшышт мландыш ынышт воч манын, вондер йыр эҥертышым ыштыман. 

Кызыт кажне суртышто теплице уло. Туштат ончыч шӱкшакшым эрыктыман, шӱйшӧ оҥам, кылдыш-влакым уэмдыман. Вич-лу сантиметр кӱкшыт ӱмбал рокшым  кораҥден, олмешыже тургыжым але вес рокым ешарен кертыда. 

Янда теплицым шовынан вӱд дене мушман, поликарбонат теплицеш «серан шашкым» йӱлалтыман. Вара теплицым кум кече петырен шинчыктыман. Тыге тушто улшо бактерийым пытареда.