Все новости
Саман увер
1 Апрель 2023, 18:10

Телефон аферистым кузе пездараш?

Тыгодсо илышыште шуко функциян телефон деч посна огешак лий. Икшыве йочасадыш, школыш але иктаж-могай кружокыш коштеш гын, чыла увертарымашым, отчётым телефонысо чатыште ончыман, отметкыжым да сурт пашажым палашат тусо электрон журнал кӱлеш. Мыламат марием У ийлан чапле телефоным пӧлеклыш. Ынде родо-шочшына дене скайп гоч ойласена.

Телефон аферистым кузе пездараш?
Телефон аферистым кузе пездараш?

Ик кечын телефонышкем палыдыме номер гыч йыҥгыртышт. Номер йымалне «Москва» манын возалтын. Мыйын Российын рӱдолаштыже илыше родо-шочшем укеат, «отклонить» манмым ниялтышым. Вес кечынат, кумшешат, эше икмыняр кече почела тӱрлӧ жапыште саде номерак йыҥгыртыш. Мый шым вашеште. «Тиде иктаж-могай банк мылам кредитым налыктынеже ынде. Кузе гына тудым пездараш?» - шонем семынем.

Ик эрдене адак йыҥгыртышт. 

- Алло, - пелештышым.

- Доброе утро! Я разговариваю с Яманаевой Ириной Петровной, верно? - шоктыш вес мучаште. 

- Мый улам, - марла пелештышым. Тудо шкеж дене палдарыш, вара кредит, процент-влак нерген ойлыш-ойлышат, йодеш: 

- В ближайшее время хотели бы вы отправиться в путешествие, поменять мебель или потратить такую сумму на какие-либо другие нужды?

- Умылтарынеда гын, марла ойлыза. Мый тендам ик пырчат не понимаю, - манам.

- Извините, пожалуйста, мы вам перезвоним, - шоктыш телефон гыч, да кыл кӱрльӧ. Тылеч вара тиде номер гыч ик ганат ышт йыҥгырте. А те «Марий йылме молан кӱлеш?» маныда. Ондалкалыше-влакым, аферистым да киш гай пижше банк пашаеҥым пездараш шочмо йылме эше кузе полша!

Автор:Н. КАЙНИЕВА. Нефтекамск ола.
Читайте нас: