Самозанятый семын шуктымо пашан ойыртемже

Йӧнан налог ставка-влак

Самозанятый-влаклан налог ставка эн изи. Окса вес еҥ деч пурен гын, нуно 4 процентым веле тӱлат, юрлица але индивидуальный предприниматель деч пурышо оксалан 6 процент шотлалтеш. Ставка-влак 2028 ий марте огыт вашталт. Самозанятый-влак налогым паша парышышт гыч веле тӱлат. Парыш уке гын, тӱлашат ок кӱл. Тӱлымӧ налогын ужашыже обязательный медицина страхованийлан кая. Тидлан кӧра самозанятый-влакын ОМС полис дене тугок медицина полышым налаш правашт уло. Нунылан налог служба деч шылме ок кӱл, тӱрлӧ увертарымашым пуаш да шке сатулан але услугылан рекламым ышташ, тыгак банкыште кредитым налаш але визым оформитлаш парыш нерген справкым налаш лиеш.

Проста регистраций

Регистрацийым эрташлан самозанятый-влаклан документым погымо, кугыжаныш пошлиным тӱлымӧ ок кӱл - чыла сомылым сурт гыч лекдеат ышташ лиеш. Интернетыш пурыман да регистрацийлан ик йӧным ойырыман.

Тидым «Мой налог» мобильный приложенийыште, ФНС-ын сайтыштыже, банкысе личный кабинетыште але Госуслуги порталыште шукташ лиеш. Регистраций годым кажне самозанятыйлан бонус шотеш 10 000 теҥге оксам пуат. Тудым налогым тӱлаш кучылтман. «Самозанятый» статус гыч лекташат куштылго, тидлан «Снять себя с учета» кнопкым веле темдалман. 

Нимогай отчет уке

Эше молан предприниматель-влак «самозанятый» статусым ойырат? Тыште налоговый органлан отчетым ышташ, декларацийым сдатлаш, бухгалтерым кучаш але посна шинчымаш огыт кӱл. Налог «Мой налог» приложенийыште автоматически шотлалтеш. Тудым кеч-могай карт гыч тӱлаш лиеш. Касса аппаратланат роскотыш пурымо ок кӱл, вет чек-влак «Мой налог» приложенийыште шкеак ышталтыт. Нуным клиентлан смс йӧн дене, мессенджер гоч але электрон адресыш колташ лиеш. 

Бизнеслан грантым налаш лиеш

Моло бизнесъеҥ семынак, самозанятый-влаклан кугыжаныш полышым ойыра. Нуно бизнесым почаш да вияҥдаш грантым налын, кугыжаныш закупкыш ушнен, изи бизнеслан кугыжаныш программа-влак дене пайдаланен кертыт. Мутлан, нунын кугыжаныш погылан льготный арендым кучылташ, предпринимательствылан полышым пуышо рӱдерыште финанс да правовой йодыш шотышто тугок каҥашым налаш йӧнышт уло. 

Самозанятый-влаклан мом шотыш налман

• Идалыклан 2,4 миллион теҥге деч утларак оксам ыштен налман огыл;
• Пашам шкевуя, наемный пашаеҥ деч посна, шуктыман;
• Тиде режимлан келшыше пашам веле ышташ лиеш.

Мо сайже

• Налогообложенийын изи ставкыже;
• Бизнес легальныйлан шотлалтеш;
• Налог автоматически шотлалтеш да тӱлалтеш;
• Официально пеҥгыдем-дыме парыш;
• Юрлица-влак дене пашам ышташ лиеш.

Кӧ самозанятый лийын кертеш?

• Репетитор, илыме верым сдатлыше, тыгак косметолог, парикмахер, массажист, няня, сиделка, фотограф, видеооператор, пайремым вӱдышӧ, бухгалтер-влак.

Кӧ самозанятый лийын ок керт?

- Шке огыл ыштыме сатум ужалыше-влак; 

- Посредник але агент-влак; 

- Кочывӱдым, сигаретым, эмым, лотерей билетым, пун, коваште гыч ыштыме сатум да маркировкым йодшо моло арверым ужалыше-влак;

- Полезный ископаемыйым лукшо да ужалыше еҥ-влак;

- Офисым але илыдыме недвижимостьым, мутлан, апартаментым але гаражым сдатлыше-влак;

- Госслужащий-влак (илыме верым арендыш сдатлыме сомыл деч веле парышым налын кертыт);

- Адвокат, нотариус, арбитражный управляющий, медиатор да оценщик-влак (тӱҥ сомылышт дене). 

ЙОДЫШ

Штатыште шотлалташ да самозанятый семын пашам ышташ лиеш мо?

Лиеш, закон тидлан чаракым ок ыште. Мутлан, школысо туныктышо, самозанятый лийын, официально репетиторство дене заниматлен кертеш. Туныктышын пашадарже гыч налогым молгунамсе семынак бухгалтерий кучен кодаш тӱҥалеш, а школ деч ӧрдыжсӧ паша деч пурышо  парышлан налогым туныктышо приложений гоч шке тӱла.