2023 ийыште калыкын илышыжым саемдаш полшышо вич вашталтыш

Пенсионер-влаклан путешествийыш кошташ йӧн ешаралтын

Республикыште 2019 ий годсек «Башкирское долголетие» программа пашам ышта. Тиде проектым лӱмын кугурак тукымлан ямдыленыт. Тудо илалше-влаклан уло республика мучко тӱрлӧ верлаш экскурсий дене миен толаш йӧным ышта. Ялысе калык, мутлан, программа полшымо дене Уфаш миен, тусо сылне вер-влакым ончен, а оласе-влак, мӧҥгешла,  кундемысе эн тора лукыш кудалын, йырысе мотор пӱртӱс лоҥгаште каналтен да тӱрлӧ калык-влакын илыш-йӱлашт дене палыме лийын кертыт. 

Кодший БР Вуйлык Радий Хабиров программыш ушнаш шонышо-влакын чотыштым да нунылан экскурсийыш миен толаш вер-влакым ешараш шӱден. Проектын финансированийжымат кок пачаш - 48 миллион теҥге марте - кугемденыт. Тыгай вашталтыш 20 тӱжем пенсионерлан идалыклан ик гана путешествийыш тугок каяш йӧным ышта. Программыш ушнашлан долголетие.соцтуризмрб.рф сайтыште регистрацийым эртыман, кайышаш верым, келшыше маршрутым да кечым ойырыман. 

Села гыч олаш миен толаш куштылгырак лиеш

2023 ийыште республикыште транспорт реформын кокымшо йыжыҥже тӱҥалеш. Радий Хабировын регионым вуйлаташ тӱҥалмыж годым пассажир-влакым кондыштарыме шотышто ситуаций пеш неле ыле. Тугодым тиде рынкыште частный перевозчик-влак озаланеныт. Нуно калыкын чӱчкыдын пайдаланыме маршрут-влакым айленыт да еҥ-влакым тошто ПАЗ-влак дене кондыштареныт. «Башавтотранс» ГУП-ын паркыштыжат тошто автобус-влак веле лийыныт. Кызыт ситуаций эркын вашталтеш. Маршрутыш кугу автобус-влак лектыт, общественный транспорт коштмо графикым ыштыме, корнысо «сар-влак» чарненыт. 

Реформын кокымшо йыжыҥыштыже республикысе населенный пункт-влак кокласе транспорт сообщенийым саемдат. Тыште район-влаклан тӱткышым ойырат. Ялыште илыше еҥ-влак райрӱдыш нелылык деч посна миен толын кертшаш улыт. Кажне ялче, села гыч кӱлеш жапыште корныш лектын, тудо кечынак палемдыме жаыште мӧҥгыжӧ пӧртыл шушашыжым палышаш. 

Районлаште у корно-влак лийыт

Эше ик сомыл - села-влакым икте-весе дене ушышо корнылашке тыгыде кӱм шарымаш. Тиде сомыл корнылаште лӱдыкшыдымылык йодышым саемда, дорожно-транспортный происшествийым шагалемда. Тыгак илыме верым чоҥымо кугыт дене Башкортостан эре ончылно улеш. Но у пӧртыш илаш куснымо годым еҥ-влакым инфраструктурыжо южгунам ок куандаре. Ынде у микрорайонлаштат корным саемдыме йодышлан тӱткышым ойыраш тӱҥалыт. Ий еда район-влак корно-влакым шотыш кондашлан регионысо бюджет гыч миллион теҥге дене шийвундым налыт. Кодший нунылан 270 миллион теҥге наре оксам ойырымо ыле. 2024 ий марте район-влак 7,3 тӱжем километр корным тӱзатышаш улыт. Республика Вуйлыкын мутшо почеш, тыгодымак асфальтым шарыме да корно-влакым капитально ачалыме нергенат мондыман огыл.

Яра кийыше мландымат ӱдат

2023 ийыште республикысе пасулаште ӱдышаш мланде шукырак лиеш. Шурным, йытыным, соям, шемшыдаҥым, кукурузым, йошкарушменым шукырак ӱдаш тӱҥалыт. Кугыжаныш озанлык-влаклан вес элла гыч кондымо нӧшмӧ дене полша. Вӱдыжтарыме мланде кумдыкымат кугемдат. Яра шогышо озадыме мланде-влакым учетыш налыт. Регионым вуйлатыше БР Правительствылан, Росреестрлан да Россельхознадзорлан 2023 ийыште ял озанлыкыште кучылтмо мланде-влаклан инвентаризацийым эртараш шӱден, 2024 ийлан ик гектар мландат кучылтде кийышаш огыл манын палемден. Нине участкылаште ял озанлык сатум ыштен лукмо производствым почыт. 

Республикыште 2021-2026 ийлан пищевой да перерабатыватлыше промышленностьым вияҥдыме концепцийым ямдыленыт. Тидлан кӧра производствылан модернизацийым эртараш, переработка дене заниматлыше изи предприятий-влакым вияҥдаш, кадр йодышым саемдаш, верысе сатум ыштен лукташ тӱҥалыт.

Спорт объектым шукырак чоҥат

Республикысе калык таза илыш-йӱлалан тӱткышым шукырак ойыраш тӱҥалын. Теният кундемыште спорт сооруженийым утларак чоҥаш шонат. Уфан 450 ияш лӱмгечыже вашеш иканаште икмыняр кугу спорт объектым - кучедалме рӱдер да гребной слаломлан сооружений-влакым - чоҥат. Районлаште да олалаште еҥ-влакын илыме пӧртышт воктене сайын оборудоватлыме, йӧнан площадка, физкультур да тазартыме комплекс, бассейн, хоккей дене заниматлыме коробка-влак лийышт манын тыршат.