Калыкнан чотшо шагалемеш

Тунам шотлымо годым Россий Федерацийыште 147 182 123 еҥ (68 431 580 пӧръеҥ да 78 750 543 ӱдырамаш), Башкортостан Республикыште 4 091 423 еҥ (1 931 622 пӧръеҥ да 2 159 801 ӱдырамаш) илен. Мемнан республикыште, 4 025 367 еҥ могай калык гыч улмыжым ончыктымым шотыш налын, шукырак чотан-влакым тыге радамлаш лиеш: руш - 1 509 246, башкир - 1 268 806, татар -  974 533, марий - 84 988, чуваш - 79 950, удмурт - 17 149, украин - 14 876, мордва - 10 970, узбек - 10 148, армян - 9 128 да молат.

Элыштына калык переписьыш ушнышо-влак кокла гыч 423 803 еҥже (2010-шо ийыште - 547 605 еҥ) марий лийын. Нунын кокла гыч 246 560 еҥжын шочмо кундемже - Марий Эл Республика. Тыгак марий-влак Башкортостан Республикыште (84 988), Киров областьыште (18 766), Татарстан (15 666), Удмуртий Республиклаште (5983), Ханты-Мансийск автономный округышто (4982), Нижегородский областьыште (2919), Чуваший Республикыште (2904), Пермь крайыште (1955) да моло кундемлаште илат.   

Башкортостан Республикыште 1979-ше ийыште 106 793, 1989-ше ийыште (тунам эше Башкир АССР-ыште) 105 768, 2002-шо ийыште 105 829, 2010-шо ийыште 103 658 марий шотлалтын. Латик ий жапыште республикыштына 18 670 марийым «йомдаренна» гын, эл мучко марий калыкын чумыр чотшо 123 802 еҥлан шагалемын.