Радий Хабиров дене «вияш линий»

Мобилизаций да добровольческий батальон нерген

- Республика частичный мобилизаций дене кылдалтше заданийым тичмашнек шуктен. Ынде республикысе да верысе власть ончылно вес задача шога - мобилизоватлыме еҥ-влаклан да нунын ешыштлан полшыман. Пытартыш арняште слаживаний верла гыч кум икшыван 200 наре пӧръеҥым мӧҥгеш пӧртылтымӧ, нунын олмеш мобилизоватлаш лийме рвезе-влакым колтымо.

СВО зоныш кайыше рвезе-влакым пагалымем нерген ойлынем. Мыланемат нуным ик гана веле огыл ужаташ логалын, ешышт дене шӱлыкаҥынрак, но шкеныштым моштен кучен чеверласымыштым ужынам. Нуно турист семын путешествийыш огыл, илышлан да тазалыклан лӱдыкшӧ верыш каят.

Тыгодым республикыште эше Салават Юлаев лӱмеш добровольческий батальоным чумырымо. Тудо СОБР-ын да ОМОН-ын ветеранышт гыч погымылан кӧра Росгвардий войска-влакын составышкышт пура, - каласен Радий Хабиров. 

Транспорт реформа нерген

 - Уфаште реформын икымше йыжыҥже шушаш ийыште брутто-контрактыш куснымо да автобус-влакым ешарыме дене мучашлалтеш. Мыняр-гынат автобусшым Уфа гыч районлаш колтена, тушто кокымшо йыжыҥ тӱҥалтышым налеш. Тудын тӱҥ задачыже - райрӱдӧ ден ялла коклаште калыкым автобус дене шупшыктымо сомылым шотыш кондаш.

Салават Юлаевын памятникшым ачалымаш

- Салават Юлаевын памятникше рӱдаҥаш да шолдыргаш тӱҥалме, садлан реконструкцийым ышташ кӱлмӧ нерген ондакат ойленна ыле. Республика подрядчикымат ойырен налын, тудо 2023 ий мартлан проектым ямдылен шуктышаш. 

Памятникым постамент гыч кораҥдаш кӱлеш-укежат, кузе писын тидым ыштышашыжат тунамак рашемшаш. Эксперт-влак вашкыман, лӱдыкшӧ маныт гын, Уфан 450 ияш лӱмгечыжым памятник деч посна палемдена. Ты йодышым мер калык денат каҥашена. 

Вуйлык шке отставкыж нерген «манешымат» рашемден

«Мый сайлыме вуйлатыше улам, еҥ-влак мыланем ӱшаненыт да республикын ончыкылыкшым мый денем кылдат, садлан нигушкат каяш шонымаш уке. Но шке пашамым служба семын аклем. Иктаж-могай вес сомылым шукташ кӱштат гын, тудым ыштем. Приказ лиеш - шинельым чиена да шӱдымӧ верыш каена. Манешым 2024 ийыште лийшаш сайлымаш деч ончыч шаркалат. Ты верым айлаш шонышо моло еҥат уло, садлан «цирклан» ямдылалтман», - каласен Радий Хабиров отставка шотышто манеш нерген вашештымыж годым.

Южо элын, тыгак Украинын, тудын шотышто санкцийым лукмышт шотышто мом шонымыж денат палдарен.

«Тыште нимогай политический смысл уке. Молан тидым ыштат? Мый шке позициемым нигунам шылтен омыл - эре «путинист» улам манын ойленам да тидден кугешнем. Элна неле ситуацийыште улмо, еҥ-влак колымо годым шке позицийым ончыктыман. Элыште илет гын, неле татыште тудлан полшышаш улат», - манын тудо.

Вуз-влакым ушымо нерген

- Ме вуз-влакым пытараш огыл, вияҥдаш кӱлмылан ушенна. Ушымо университетлан шукырак оксам ойырен, Российысе вуз-влакын картыштышт «виян модшым» ыштынена. Башкир кугыжаныш университетын Права институтшын вуйлатышыже-влак ты пунчаллан мыйым каргат дыр, но мый ты шонымаш чын улмым паша дене доказатлем. Ме нигӧм паша гыч луктын огына колто, но його-влакым огына кучо. Студент-влак тыгай чапле вузышто тунеммышт дене кугешнаш тӱҥалыт.

У ий корпоративым кузе эртарыман

- Офисыште погынен, коллега-влакым саламлымаште да шампанскийым подылмаште нимо удажат уке. У ийым коллега-влак дене, еш дене палемден кертына. Но тыгай жапыште, артист-влакым ӱжын, кугун пайремлымаш лийын ок керт. Тыге ыштылаш шотлан ок тол.

Чыла йодмашым администрацийлаш колтымо

Радий Хабиров шкенжын администрацийжылан «вияш линийыш» колтымо чыла йодмашым ответственный еҥ-влаклан шеледен пуаш да кузе шуктымо нерген палдараш шӱден. Садлан, йодышдам йоҥгалтарен огытыл гынат, вашмутым садак налыда.

Сай увер

Пенсионер-влаклан республикын вер-шӧрлажым тугок ужын кошташ йӧным пуышо «Башкирское долголетие» программа огеш петыралт, мӧҥгешла, вес ий кок пачаш шукырак пенсионер кундемнам ончал савырнен кертеш.