9 классыште тунемше-влак поэтын почеламутлажым йоҥгалтарышт, прозо гыч ужашлам мастарын модын ончыктышт. 7 «а» класс ӱдыр-влак пайрем вашеш Яныш Ялкаевич лӱмеш серыме почеламут корнылаштым уло кумылын лудыч. Кажне тунемшын тӱсыштыжӧ, йӱкыштыжӧ землякышт верч кугешнымаш, куанымаш кумыл раш шижалте.
Изирак ӱдыр-влакат ӧрдыжеш ышт код. Погынышо уна-влакым ныжылге марла куштымаш дене саламлышт. Нунышт куштышо-влакын кажне движенийыштым шулен ончышт. А семже уло шӱм-чоным авалтен налын, шонымашым ала-кушко торашке наҥгаен, шонкалаш таратен. Лач тыгаяк Я. Ялкайнын шулдыран поэзийже: чонеш логалше, тыматле, эре ончыко ӱжшӧ.
Пайремнам Мишкан кундемысе весела такмак-влак дене мучашлышт. Шке жапыштыже Я. Ялкайнат калык мурым чот йӧратен да нуным поген. Кӧ пала: ала самырыкше годым тиде такмак-влакым Чорай уремыштат йоҥгалтарен?
Я. Ялкайн лӱмеш сквер гыч поэтын «Чорай» почеламутшо уремым шергылтарен шарлыш. Виталина Янситова тудым моткоч мастарын лудын пуыш.
Шуко поро мут деч вара Я. Ялкаевым шарныме лӱмеш памятникше воктек мотор пеледыш аршашым пыштышт.