Уремыште теҥгылыште шинчымына мондалтеш…

Икмыняр кова чумыргымеке, нуно тӱрлӧ историйым але манеш-манешым каласкаленыт. Мый нуным колыштынам. Поснак рвезе пагытышт нерген мутланымышт келша ыле. Нуно чылан пырля кечывалым пашам ыштымышт, а кастене, погынен, кӱварыште «кандырам пунымышт» нерген ойленыт. Война пагытым, чодыраште кузе пашам ыштымым, мом ужмыштым шарналтат ыле. Адакшым тыглай историйым гына огыл, а овда але таргылтыш, казамат гыч шылын куржшо нерген тӱрлӧ лӱдыкшӧ историй-влакымат каласкаленыт. Тунамже мӧҥгӧ каяш лӱдын шинченна.  

Икмыняр ойышт вуешем кодын. Нуно ойлат ыле, пуйто тугай жап толын шуэш, кунам вуй ӱмбалне кӱртньӧ кайык-влак чоҥештылаш тӱҥалыт, айдеме-влакын вуй ӱмбалыштым эҥыремышвот налеш, родо-шочшо-влак икте-весе деке коштмым чарнат, еҥ-влак пеш осал лийыт, порылыкым мондат. 

Кызыт капка ончылно шинчыше-влакым шагал ужаш лиеш. Ала илыш вашталтын, ала чынак еҥ-влакын икте-весышт дене ваш келшен илымышт огеш шу… Ожно тыге икте-весе дене ваш кутырен шинчымым кызытсе Интернет дене таҥастараш лиеш мо? Тунам шинчаваш ойленыт гын, кызыт экран гоч ваш шинчен мутланат. Шӱм-чон тургыжланымым икте-весылан «смайлик» дене почын пуат. Тидын деч вара кова-влакын мутыштым, от шоно гынат, ушеш пыштет.

Ковам илыме уремыште тачысе кече мартеат ӱдырамаш-влак погынен шинчат. Кажне кастене огыл гынат, пырля чумыргымыштым чӱчкыдын ужаш лиеш. Ожно капка ончылно шинчымаш ваш келшен илымым ончыктен гын, кызыт мӧҥгешла шонашат лиеш.

Photo by Eduardo Barrios on Unsplash