Йолташ ӱстел коклаште веле

Ожно, изина годым, школышто йолташ могай лийшаш нерген раш каласкалат ыле: кеч-могай жапыште полыш кидым шуялташ ямде, поро кумылан, ӱшанле. Тудо пагытыште калыкшат вестӱрлӧ, поро кӧргӧ чонан лийын. Пӧртым нӧлтымӧ, шудым ыштыме але вес кугу сомылым тарватыме годым еҥ-влак ваш полшен иленыт. 

Ындыже «Йолташ ӱстел коклаште шинчыме годым гына» маныт. Иктаж кугурак пашам тӱҥалат гын, вигак «Кӧм полшаш каласена?» манын шонымаш ушыш толын пура. Кычалат гынат, чылаштын шке сомылышт уло. Ала полшымышт ок шу, ала чынак яра огытыл? 

Калык йӧршын вашталтын. Икте-весылан ӱшанен, эҥертен илымаш мондалтын. Уланрак-влак «Мый шкат кертам» маныт, а южышт ик кече дене гына илат, «Вес гана мыламат полыш кӱлеш лийын кертеш» манын огытат шоналте. 

Оксат але автомашинат уло гын, тый денет келшат, уке гын, «Туддеч нимом налаш» маныт да огытат мутлане. 

Мом арален кодыман гын, тиде кована-кочана-влакын ожно кузе илыме поро йӱлаштым огыл мо? Икте-весылан ваш полшет гын, илашат куштылгырак. 

Photo by Clarisse Meyer on Unsplash