Мошенник-влак деч аралалтса!

* Интернет-кевытыште сай ак дене сото телефоным, ноутбукым але фотоаппаратым налнеда, но кевыт предоплатым ышташ йодеш. Нигунам электрон кошелекыш, мобильный телефон-влакын счетышкышт оксам ида колто. Интернет-кевыт акшым нигунам тыгай йӧн дене ок нал. 

* Телефонышкыда «Мобильный перевод» услуго полшымо дене окса пурымо нерген сообщений толеш. Тулеч вара тыланда йыҥгыртат да переводым йоҥылыш ыштыме, садлан «Мобильный перевод» йӧн денак мӧҥгеш але вес каласыме номерышкышт пӧртылташ йодыт. Тыгай шоялан ида ӱшане. Йодмо оксам колтымеке, тендан счет гыч тынарак оксада йомеш.  

* Мобильный связь операторын техподдержка службыж гыч договорын условийжым пудыртенда манме смс толеш. Тушто тендан вашеш штрафной санкцийым кучылтмо але абонент номердам йӧртен кертме нерген палемдыме. Тыманмеш шкендан мобильный операторланда йыҥгыртыза да чыла рашемдыза. Связь услугын потребительже семын, тендан правадам закон аралыме нерген ида мондо. Айдеме титакан улеш гын, тидым пеҥгыдемдыде, связьын нимогай операторжо тыланда штрафым тӱлыктен огеш керт. 

* Шарныза: палыдыме еҥ йыҥгырта да родо-шочшыда эҥгекыш логалын манын, палемдыме адрес почеш оксам кондаш йодеш гын, ида ӱшане: тиде мошенник. Шочшыдан телефонжо йӧртымӧ гын, тудын палымыже, коллегыже, йолташыже-влаклан йыҥгыртыман. 

* Телефонышкыда смс дене музыкым, сӱретым але видеом скачатлаш ссылке толын гын, нигунам тыгай ссылкым ида темдал. Ссылка почеш пуреда гын, телефонышкыда иктаж вирус логалын кертеш, але оксам тӱлымӧ услугылан возалташ лиеш. Смс-ым колтышо номерышкат ида йыҥгырте. Тыге телефон номер дене кылдалтше счет гыч оксада йомын кертеш. Сообщений палыме еҥ деч толын гынат, тудо колтен але уке - рашемдыза. 

* Интернет полшымо дене мутланеда, соцлаштыклаште аккаунтда уло? Тугеже личный информацийым ида колтыл да виш доступышто ида вераҥде. Чыла видео ден аудиотрансляций, сетевой перепискыдам злоумышленник-влак, арален коден, тендан ваштареш кучылт кертыт.  

* Автомобильым модын налме нерген электрон сообщений толын, да тендам призым налашлан оксам колташ йодыт. Палыдыме еҥлан электрон счетыш оксам колтымо ок кӱл. 

* Интернет гоч авиабилетым налнеда гын, билетым ужалыше палыдыме да тергыдыме сайт-влак дене ида пайдалане. Билетым налашлан заказым шкем сай могырым веле палдарыше агентство-влакын сайтышт гоч ыштыза. 

Башкортостан Республикысе МВД-н уверже негызеш Л. ШАВАЛИЕВА ямдылен.