Миллион еҥ илыман ола шукемын

2010-2021 ийлаште калык чот шагалем толын - колышо еҥ шочшо икшыве деч шукырак лийын. Но ты жапыштак Российыш 5,4 млн утла еҥ илаш толын, а 3,04 млн утлаже вес эллаш куснен каен. Тыге миграционный прирост (кок показатель кокласе ойыртем) 2,4 миллионыш шуын. Тудын 93,5 процентше - ончычсо СССР-ын индеш элже, утларакше Украин, Казахстан да Таджикистан гыч толшо-влак.

Элыште миллион еҥ илыман 16 ола уло: Москва, Санкт-Петербург, Новосибирск, Екатеринбург, Казань, Краснодар, Нижний Новгород, Челябинск, Красноярск, Самара, Уфа, Ростов-на-Дону, Омск, Воронеж, Пермь, Волгоград (Красноярск, Краснодар, Пермь да Воронеж ты радамыш пытартыш перепись деч ончыч ушненыт). Нине олалаште элысе калыкын ик нылымше ужашыже - 35,7 млн еҥ - шотлалтеш. 

11 ий жапыште элысе 28 регионышто еҥ чот шукемын. Ончылно улшо-влак семын Москвам да Московский областьым, Санкт-Петербургым да Ленинградский областьым, Краснодарский крайым палемдат. Кызыт 75% россиянин олалаште (11 ий ончыч 1 процентлан шагалрак улмаш) верланен.

Йӧсын логалаш лийме кундемлаште калык переписьым 2020 ий 1 октябрь гыч 2021 ий 20 декабрь марте эртареныт. Кызыт тушто 500 тӱжем деч шагалрак еҥ ила.

2021 ий октябрьыште Башкортостаныште 4,091 млн (2010 ийыште - 4,072 млн) еҥ лийын. Чумыр калык чот дене республика элыштына Москва, Московский область, Краснодарский край, Санкт-Петербург, Свердловский да Ростовский область-влак деч вара шымше, Юл кундемысе федерал округышто икымше улеш.  

Росстат Всероссийский калык переписьым 2022 ий 31 декабрь марте тичмашнек иктешлен шукташ шона.