Все новости
Саман увер
18 Ага 2022, 10:59

Пионерийлан - 100 ий: «Йоча шӱм-чонын комиссарже-влак»

Школлаште пионер-влакым элнан патриотшо лияш туныктен, мер илышыш ушен куштымо кугу пашам шуктышо кугурак пионервожатый-влакым «йоча шӱм-чонын комиссарже-влак» маныт ыле. Нунын тыршыме дене ятыр тӱжем йочан пионер жапше оҥайын, веселан да пайдалын эртен. 19 майым - Пионерий кечым - кажне тунемше шӱм вургыжын вучен. Кажне класс пӱртӱс лоҥгаш, тулото воктеке лекташ кыртмен ямдылалтын. «Взвейтесь кострами, синие ночи…» мурым чылан пырля муреныт. Тиде мурын корныжо-влак кажне совет пионерын ушешыже, чонешыже келгын шыҥен кодыныт. Тунамсе тунемше-влак ты весела жапым таче мартеат порын шарнен илат. Нунылан пионервожатый тӱҥ пример лийын.

Еш архив гыч налме фото-влак. Шаран район вожатый-влак. Л.Д. Султанбуратова икымше радамыште шола гыч нылымше.
Шаран район вожатый-влак. Л.Д. Султанбуратова икымше радамыште шола гыч нылымше.Фото:Еш архив гыч налме фото-влак.

Шаран район Акпарс кундемыште «пионервожатый» мутым колмеке, тысе калык вигак Любовь Давлетгуловна Курмакаеван (Султанбуратован) лӱмжым шарналта. Поро кумылан, эреак весела шинчаончалтышан чулым ӱдырамаш тунамсе ятыр йочан чонышкыжак «пурен шинчын» манам гынат, йоҥылыш ом лий, шонем.

Любовь Давлетгуловна, латшым ияш ӱдыр, 1977 ийыште тиде школыш библиотекарьлан пашаш толын, рисований да пений урок-влакым намиен. Тунамак йырже тунемше-влакым чумырен моштымыж дене ойыртемалтын. Вес ийжылан чолга ӱдырым вожатыйлан шогалтеныт. Пашажым чот йӧратен, чыла вереат ончылно, изиеҥланат, кугурак-влакланат примерым ончыктышо маяк гай лийын.

Совет пионерийын тӱҥ пайремже вашеш мый лӱмынак Любовь Давлетгуловна деке унала мийышым, тунамсе жапым шарналташ йодым. «Те вожатыйлан ыштыме жапдам шарнеда мо? Ушешда мо эн чот шыҥен кодын?» йодыш-влаклан тыге вашештыш: «Ой, тидым мондаш лиеш мо? Мый 1978-1985 ийлаште школышто пионервожатыйын сомылжым шуктенам. Коллектив сай лийын, йоча-влак дене кыл вашке пеҥгыдемын, паша келшен. Кажне кечыже манме гай ушеш кодын. Мый пашамым йӧратенам, тудын дене иленам. Ӱдыр-рвезе-влак коклаште шкаланемат йочала куанен-йывыртен тыршаш логалын. Нуно мыйым эреак кумылаҥден шогеныт.

Мемнан пионер дружинына Ю.А. Гагаринын лӱмжым нумалын, районышто эре правофланговый лийынна. Тудо жапыште йоча шуко лийын, шып шинчаш логалын огыл, эре могай-гынат мероприятийым эртарыме: «Зарница», тӱрлӧ слет, торжественный сбор, линейка, тимуровский паша, фермыш полшаш коштмаш, агитбригада, концерт, конкурс-влак, макулатурым, кӱртньӧ пудыргым, пӱгыльмым погымаш да молат. Мусагит памаш воктек турпоход дене кайымыжак мом шоген?!

1982 ийыште «Орленок» пионер лагерьыште вожатый-влаклан Всесоюзный слётым эртарышт. Мемнан республикын делегацийже радамыш мыят логальым. Тунам моткоч куаненам ыле, вет тушко эн сай вожатыйым веле колтеныт. Тудо ийынак мыланем «вожатый-инструктор» лӱмым пуышт. Тугеже, арам огыл пашам ыштем, лектышем уло манын шоненам».

Пашам сайын ыштымыжлан чолга вожатый 1983 ийыште путевка дене Болгарийышкат канаш миен толын. Тунам тӱрлӧ шотан вожатый пашам утларакше самырык-влаклан ӱшаненыт. Ӱдыр-рвезе-влак тиде пашаште шуаралтыныт, пеҥгыдылыклан тунемыныт. Вара нунын кокла гыч шукышт школ директор, завуч, вуйлатыше лийыныт.

«Пӱрымаш деч от шыл», - манеш калык. Любовь Давлетгуловнат организатор, школ директор марте кушкын. Шуко ий йоча-влаклан марий йылмым да литературым  туныктен. Тунемшыже-влак районысо да республикысе конкурс ден олимпиадылаште сеҥышыш лектыныт. Пашажым Шаран район администрацийын, образований пӧлкан, БР Образований министерствын Чап грамотышт дене аклыме, «РФ общий образованийын почетный пашаеҥже» улеш. 

Кызыт Любовь Давлетгуловна сулен налме канышыште. Марийже Анатолий Ульянович дене ныл икшывым ончен куштеныт, тунемаш полшеныт, вич уныкалан коча-кова улыт. 

Любовь Давлетгуловна совет пионерий шӱлышеш шуаралтын, тапталт кушкын, кызытат чонжо самырык тукым верч тургыжлана, нунын ончыкылыкышт волгыдо лийже манын шона.

Еш архив гыч налме фото-влак. «Орленок» Всероссийский пионер лагерьыште. Любовь Давлетгуловна Башкирий гыч мийыше вожатый-влак коклаште кокымшо радамыште пурла гыч нылымше.1982 ий.
«Орленок» Всероссийский пионер лагерьыште. Любовь Давлетгуловна Башкирий гыч мийыше вожатый-влак коклаште кокымшо радамыште пурла гыч нылымше.1982 ий.Фото:Еш архив гыч налме фото-влак.
Автор:Г. АХМЕТШИНА. Шаран район.
Читайте нас: