Шаран район Акпарс кундемыште «пионервожатый» мутым колмеке, тысе калык вигак Любовь Давлетгуловна Курмакаеван (Султанбуратован) лӱмжым шарналта. Поро кумылан, эреак весела шинчаончалтышан чулым ӱдырамаш тунамсе ятыр йочан чонышкыжак «пурен шинчын» манам гынат, йоҥылыш ом лий, шонем.
Любовь Давлетгуловна, латшым ияш ӱдыр, 1977 ийыште тиде школыш библиотекарьлан пашаш толын, рисований да пений урок-влакым намиен. Тунамак йырже тунемше-влакым чумырен моштымыж дене ойыртемалтын. Вес ийжылан чолга ӱдырым вожатыйлан шогалтеныт. Пашажым чот йӧратен, чыла вереат ончылно, изиеҥланат, кугурак-влакланат примерым ончыктышо маяк гай лийын.
Совет пионерийын тӱҥ пайремже вашеш мый лӱмынак Любовь Давлетгуловна деке унала мийышым, тунамсе жапым шарналташ йодым. «Те вожатыйлан ыштыме жапдам шарнеда мо? Ушешда мо эн чот шыҥен кодын?» йодыш-влаклан тыге вашештыш: «Ой, тидым мондаш лиеш мо? Мый 1978-1985 ийлаште школышто пионервожатыйын сомылжым шуктенам. Коллектив сай лийын, йоча-влак дене кыл вашке пеҥгыдемын, паша келшен. Кажне кечыже манме гай ушеш кодын. Мый пашамым йӧратенам, тудын дене иленам. Ӱдыр-рвезе-влак коклаште шкаланемат йочала куанен-йывыртен тыршаш логалын. Нуно мыйым эреак кумылаҥден шогеныт.
Мемнан пионер дружинына Ю.А. Гагаринын лӱмжым нумалын, районышто эре правофланговый лийынна. Тудо жапыште йоча шуко лийын, шып шинчаш логалын огыл, эре могай-гынат мероприятийым эртарыме: «Зарница», тӱрлӧ слет, торжественный сбор, линейка, тимуровский паша, фермыш полшаш коштмаш, агитбригада, концерт, конкурс-влак, макулатурым, кӱртньӧ пудыргым, пӱгыльмым погымаш да молат. Мусагит памаш воктек турпоход дене кайымыжак мом шоген?!
1982 ийыште «Орленок» пионер лагерьыште вожатый-влаклан Всесоюзный слётым эртарышт. Мемнан республикын делегацийже радамыш мыят логальым. Тунам моткоч куаненам ыле, вет тушко эн сай вожатыйым веле колтеныт. Тудо ийынак мыланем «вожатый-инструктор» лӱмым пуышт. Тугеже, арам огыл пашам ыштем, лектышем уло манын шоненам».
Пашам сайын ыштымыжлан чолга вожатый 1983 ийыште путевка дене Болгарийышкат канаш миен толын. Тунам тӱрлӧ шотан вожатый пашам утларакше самырык-влаклан ӱшаненыт. Ӱдыр-рвезе-влак тиде пашаште шуаралтыныт, пеҥгыдылыклан тунемыныт. Вара нунын кокла гыч шукышт школ директор, завуч, вуйлатыше лийыныт.
«Пӱрымаш деч от шыл», - манеш калык. Любовь Давлетгуловнат организатор, школ директор марте кушкын. Шуко ий йоча-влаклан марий йылмым да литературым туныктен. Тунемшыже-влак районысо да республикысе конкурс ден олимпиадылаште сеҥышыш лектыныт. Пашажым Шаран район администрацийын, образований пӧлкан, БР Образований министерствын Чап грамотышт дене аклыме, «РФ общий образованийын почетный пашаеҥже» улеш.
Кызыт Любовь Давлетгуловна сулен налме канышыште. Марийже Анатолий Ульянович дене ныл икшывым ончен куштеныт, тунемаш полшеныт, вич уныкалан коча-кова улыт.
Любовь Давлетгуловна совет пионерий шӱлышеш шуаралтын, тапталт кушкын, кызытат чонжо самырык тукым верч тургыжлана, нунын ончыкылыкышт волгыдо лийже манын шона.