Пожар деч аралалтме нерген мом шарныман?

Тыгай режимым увертарыме жапыште тулотым ылыжташ ок лий. Кудывечыште, пакчаште погынышо куштырам йӱлаташ кеч изирак тулымат ылыжташ чарыме. А чодыра воктенсе аланыште але чодыра кӧргыштӧ тулым лукмо нерген ойлыманат, тушко машина але мотоцикл денат пурыман огыл. Окурко-влакымат кышкен кодаш ок йӧрӧ. 

Населенный пунктлаште тулотым ылыжтымым пожарный инспектор ден верысе администраций-влакын пашаеҥышт тергат, а егерь-влак чодыраште тӱткын эскерат. Закон шӱдымӧ деч посна тулотым ылыжтымылан пытартыш ийлаште штрафым кугемденыт. Кызыт тыглай еҥлан 4-5 тӱжем, должностной лицалан 20-40 тӱжем, юридический лицалан 500 тӱжем теҥге марте штрафым тӱлыктен кертыт.

Тидым РФ КоАП-ын «Нарушение правил пожарной безопасности в лесах» 8.32 статьяжын 3-шо пунктыштыжо палемдыме. Чодыраш машина дене пурымылан але тамакым шупшмылан, ешарен, вич тӱжем теҥге штрафым возат. Весела компанийыш погынен, чодыраш автомобиль дене каяш да тушто шашлыкым ямдылаш гын, пикникысе кажне еҥлан кок штрафым (10 тӱжем теҥге) тӱлыман лиеш. Ылыжтыме изи тулото кугу пожар марте талышна гын, миллион теҥге марте шийвундым луктын пыштыман, тыгак чодырасе тулым йӧртымӧ, чодырам уэмдыме роскотым петырыман лиеш. Кугу эҥгек годым кум ий мартеат эрык деч посна кодаш пунчалын кертыт.

Чодыра нимо уке гыч  ок йӱлӧ 

Кодший уло республикым поснак чот талышныше кугу пожар-влак тургыжландарышт. Нунын чотышт 480-ыш шуын. Пожар-влак тӱҥ шотышто кечывалвел да эрвел район-влакым авалтеныт. Тугодым 15 тӱжем гектар чодыра йӱлен. Тул ваштареш шӱдӧ спасатель да тӱжем наре доброволец кучедалыныт. Абзелил, Баймак, Белорецк, Бурзян, Зианчура, Зилаир, Ишимбай, Кугарче, Нуриман, Учале да Хайбулла район-влак поснак пожар лийын кертме лӱдыкшӧ верлан шотлалтыт. Тидыже географий, климат да рельеф ойыртем дене кылдалтын. Тений пӱртӱсыштӧ икымше пожар 19 апрельыште Баймак районышто талышнен, тудо пел гектар мландым авалтен. Искусственный чарак - мландым корымо корно - пожарлан населенный пунктлаш шуаш эрыкым пуэн огыл. 

Кодший пӱртӱсыштӧ пожар-влак кукшо пушеҥгыш але шудыш волгенче логалмылан кӧра талышненыт. Кокымшо амал - айдемын айда-лийже койыш-шоктышыжо. Йӱлышӧ шырпым кудалтымаш, йӧртыдымӧ тамак, шудым ылыжтымаш, лупа семын кечыйолым погышо кленчам кодымаш, тӱз огыл машина гыч лекше сескем - пел чодыраже лач тыгай амаллан кӧра йӱлен. 

Шашлыкым кӱктыман огыл мо? 

Мангалысе тулото - тидат виш тул. Шашлыкым шӱч ӱмбалан жаритлаш лиеш, но тыгодым пожар деч аралалтме йодмашым пеҥгыдын шуктыман. Мангал деч кок метр ӧрдыжтӧ йӱлен кертше арвер лийшаш огыл, а чоҥымо объект марте вич метр деч шагал огыл кужыт кодшаш. Воктене вӱдым темыман мужыр ведра але огнетушитель шогышаш улыт. 

Пожар ынже лий манын, селалаште илыше калык, тыгак дачник-влак шке кудывечыштышт, пакчаштышт жапыштыже шудым солен да куштырам поген эрыктышаш улыт. Вес семынже, шӱкшакым чумыраш лиеш, тӱҥжӧ - кызытеш тудым йӱлатыман огыл!