«Турист-влакым вераҥдашлан объект-влакым чоҥымо шотышто Гафури район эн ончылно улеш. Сылне вер-шӧр да ойыртемалтше геологий объект-влак инвестор-влакым сымыстарат. Садлан меат нунылан федерал да региональный полыш дене пайдаланен кертме йӧн нерген кумдан каласкалаш тыршена», - рашемден БР туризм да предпринимательствын министрже Рустем Афзалов.
Предпринимательлан кӧра Гафури районышто глэмпинг, «палаточный городок», «веревочный парк» манме объект-влак, кафе, катамаран-влаклан причал, турист инвентарьым прокатыш налме пункт, колым кучашлан ер-влак да моло инфраструктур лийыт. Проектым вич ий жапыште илышыш шыҥдараш шонат. Эко-отельым чоҥымашлан икымше йыжыҥыште ойырымо инвестицийын кугытшо 30 миллион утла теҥгеш шуэш, увертара БР Правительствын сайтше.