ТЫНЫС ИЛЫШЫН САЛТАКШЕ

Йӱр огыл майын мландыжым мушкеш -

Куэ шортеш, парчаж ден суртыш эҥертен…

Шортеш ава, шинчаже кошкымеш, 

Кеч Сеҥымашлан шымле шым ият эртен.

Лад(ы)ра куэ лай вуйжым рӱзалта…

Молан мардеж торжа, ты шошым озыркан?

А талгыде шинчалын рокмалта -

Молан нигӧ ок поч тудлан вӱта кылам?

Пакча шеҥгелне олык ужарга -

Пӱртӱс уэммым шошым вольыкат шижеш.

Но йӧрыш трук пытартыш ӱжара,

Да сӧй пасушто рвезын ӱмыржӧ кӱрлеш…

Шинчавӱд дене Сеҥымаш толеш…

Чон ойгым шалатен ок керт яндар кава.

Шӱгар воктен салтак ава шортеш -

Ынде мландыште эрге ӱмыреш мала…

А тыныс илышым вес сарзе арала…