Шошо толын. Лум шула - вӱдшор талышна

Лум писын шула. Кодшо арнян утарыме службын 112 номерышкыже корныштым але кудывечыштым вӱд налме нерген 300 наре еҥ увертарен. Тений кугу вӱд 230 утла населенный пунктым, 11 тӱжем илыме пӧртым, 30 тӱжем утла еҥым авалтен кертеш. Химикат склад, свалке, кӱвар, регионысо да федерал корно, кӱртньыгорно, гидротехнический сооружений-влак вӱд йымалан кодшаш огытыл. Моло ийла дене таҥастарымаште, тений лум шукырак. Населенный пункт-влакым кугу вӱдшор деч аралаш манын, сапер ден спасатель-влак эҥерлаште ийым пудештарат. Тидым ышташ огыл гын, вӱд йоген каен огеш керт, погынен шинчеш да йырым-йыр кумдан шарла, а ий пудырго-влак кӱварысе свайым локтыл кертыт.

Мом ышташ ок лий? 

• Пушеҥгыш, меҥгыш да тӱрлӧ лушкыдо, палыдыме сооруженийыш кӱзыман огыл: йогышо вӱдым сеҥен кертде, нуно йӧрлын кертыт.
• Вӱд налме корно дене машина дене кудалман огыл - йогын наҥгаен кертеш.
• Вӱд темме верыште машинада пудырген гын, тудым тыманмеш кудалтен кайыза.

Кугу вӱд кайымеке: 

* Кӱрышталтше, кечалтше электровоштыр деч шекланыза.

* Вӱдыш логалше продуктым ида коч.

* Вӱд йымалне лийше памаш гыч вӱдым ида йӱ.

Нӧрыдымӧ пакетыш мом чумырыман?

1. Ӱмбал вургемым, йолчиемым, малыме арверым.
2. Туалет арверым.
3. Документ-влакым.
4. Оксам.
5. Эмым.
6. 3 кечылан ситышашлык вӱдым.
7. 3 кечылан ситышашлык кочкышым.

Кеч-могай туткарыш логалме годым 112 номер дене йыҥгыртыза.