4 ноябрь - Калык-влакын икоян улмо кечышт

Мемнан кугезына-влак, XVI курым гыч тӱҥалын, тӱрлӧ сарыште элнам араленыт: Ливон сарыште, поляк да швед интервент, Лжедмитрий II войскаже-влак ваштареш кредалме, Петр I кугыжан Швед да Азов сар корнылаже, Пруссий ваштареш шым ий шуйнышо сар годым.

Наполеонын войскалаж дене кучедалмаште башкир-влакын 28 имне полкышт руш армийлан полшен. Пикш дене устан лӱйкален моштымыштлан француз-влак нуным «йӱдвел амур-влак» манын лӱмденыт.
Фашист Германийым сеҥымаште республикысе чыла калыкым ушышо 112-шо Башкир кавалерий дивизийын надырже моткоч кугу. Дивизий Волга эҥер деч Эльба марте ныл тӱжем утла километрым эртен. 3860 сарзым орден да медаль-влак дене палемденыт. Тений Кугу Сеҥымашлан 75 ий темме лӱмеш Владимир Путин исключений семын дивизийын илыш гыч кайыше командирже Минигали Шаймуратовым сар годым лӱддымылыкым да геройлыкым ончыктымыжлан Российын Геройжо шӱдыр дене палемден.

Тӱнямбалне кӱлеш сатум луктына
Республика шке сатужым тӱнямбалсе шӱдӧ утла эллан ужала. Тений эше Бениныш, Гануш, Гондурасыш, Кувейтыш, Шри-Ланкаш, Мьянмуш, Суринамыш да Уругвайыш колташ тӱҥалме. Сатужат нефть, химий да мӱй гына огыл. Мутлан, Германийыште BMW да Mercedes тӱнямбал автолидер-влак Башкортостаныште лукмо технический углеродым кучылтыт. «Siemens» компаний мемнан республикысе предприятий деч налме станок дене пашам ышта. Тӱнямбалне палыме Moncler мода пӧрт вургем лукмаште тысе производитель-влакын ужалыме пыстыл да пун дене пайдалана. Республикыште офис-влаклан лукмо чапле пӱкеным Чечня вуйлык Рамзан Кадыров, шоу-бизнесын шӱдыржӧ-влак Филипп Киркоров да Ольга Бузова, РФ-н дипломатический миссийжын вуйлатышыже-влакат ыштыктеныт.

160 национальность келшен ила
Ме полиэтнический республикыште илена, южгунам официально «160 национальность келшен ила» манынат возат. Палыме лийме годым «Могай калык гыч улат?» манме йодыш утыр шуэнрак йоҥга докан, тӱрлӧ калыкын ӱдырышт-эргыштын ик ешым чумырымыштат нигӧм огеш ӧрыктаре. Славян тиште да тӱвыра кече-влак, Тӱнямбал Аксаков пайрем, «Евразийын шӱмжӧ» искусство, калык тӱвыра фестиваль-влак ма - кажныжым чыла калык чумырген пайремла.
Калыкнам аклен, мемнам «сай» але «уда» манаш огеш лий, но ме шке кугезына-влакын йӱлаштым да тӱвыраштым арален кодаш тыршена. Тыге мемнан дене калык художественный промысел, спортын калык видше-влакым вияҥдат, кугыжаныш 12 театр, 15 рушарня школ пашам ыштат, общеобразовательный школлаште 14 шочмо йылмым туныктат!
Ме шкенан искусствына дене Российын моло калыкше-влакымат палдарена. Режиссер Александр Галибинын Мустай Каримын «Радость нашего дома» повестьше негызеш возымо «Сестренка» фильмже кумда прокатыште икымше башкир фильм лие. Тудым ятыр престижный приз да критик-влакын поро ойышт дене палемденыт, «Россий» федерал канал дене ончыктышт. А талантан режиссер Айгур Аскаровын «Из Уфы с любовью» фильмже Уфасе прокатыште «Форсаж-8» американ блокбастерымат кок пачаш эртен каен.

Шкенан-влакым огына кудалте!
Тиде пытартыш ийласе лозунг. Кузе палемден ыле Радий Хабиров шке посланийыштыже, ме тӱшка паша верч чумыргышаш улына. Суртнам, кудывечынам, шкенан республикынам шотыш кондаш - кажнын сомылжо. Мыланна икойыш шуаш, икте-весынан шонымашыжым шотыш налаш тунемман.
Ме умыленна - ме ик калык улына. Ме огыл гын, нигӧ мемнан республикынам огеш тӱзландаре. Тыште, поро пошкудо семын, шочмо кече ден сӱаным гына пырля огыт пайремле, ойгыш логалше еҥланат полшат. Мутлан, суртышт йӱлен кайыме годым у пӧртым чылан пырля чоҥат.
Коронавирус инфекций шарлыме дене лишыл еҥлан полшымо сомыл ончыкракат лекте. Ме пырля мӧҥгышт гыч киндым налаш лектын кертдыме шоҥгыеҥ-влаклан полшышна, бизнес оксам погыш, волонтер-влак кочкыш-йӱышым, эмым нумальыч, вуйлык-влак пандемийлан кӧра йот эллаш «пижын шичше» ятыр землякланна мӧҥгышт пӧртылаш полшышт.
Ме пырля виян улына! Тиде нелылыкым пырля сеҥыме годым умылен налме тӱҥ урок. Кузе ойлат, икоян лийме годым мемнам сеҥаш огеш лий.