Тиде кугу сомылын икымше йыжыҥже - Калтаса районысо Качкинтурай ялыште вольыкым ончымо комплексым чоҥымаш. Фермым 1200 лӱштымӧ ушкалым ончаш йӧнештарыме. Тушто датский селекцийын 700 утла голштин-фриз урлык ушкалым ончат. Комплексыште нылле утла еҥ пашам ышта. Чоҥымо пашам мучашлымеке, комплексыште чылаже шӱдӧ наре еҥлан паша верым ышташ шонат. Проектлан шуко жап ямдылалтме - тудым илышыш шыҥдарыме нерген Башкортостан Вуйлык Радий Хабировын эртарыме «Инвестиций шагатыште» каҥашыме.
Качкинтурайыште фермым чоҥымо сомылым тений мучашлаш палемдыме. Инвестпроект почеш чоҥымо объектым 31 январьыште Калтаса селаш республикын 2019-ше ийысе ял озанлык да вольыкым ончымо пашажым иктешлыше семинар-совещанийыш погынышо пашаеҥ-влакат ончен савырненыт. Тушто нуно вольыкым ончымо, пукшымо да моло технологий дене палыме лийыныт. Тылеч посна семинарыш мийыше-влак «Восход» ял озанлык кооперативын Торасола ялысе МТФ-ышкыжат миеныт. Тусо вольыкым ашныме, ушкалым лӱштымӧ пашам шымленыт, объект кӧргысӧ пӧлем-влакым онченыт. Туштак «Восход» СХК-н шурным аралыме вержым да машинно-тракторный паркым ончен савырненыт. Калтаса ИКЦ-н инженер-консультантше Ю. Маникаевын мутшо гыч, паркын ойыртемже - ял озанлык техника виш кава йымалне огыл, а йӧнештарыме посна ангарыште аралалтеш. Чыла тракторым ачалыме да шошо агалан ямдылыме.
Зональный семинарын пашашкыже Калтаса, Альшей, Чишма, Кармаскале, Благовар, Дуван, Мелеуз, Бирск, Балтач, Татышле районласе администраций вуйлатыше-влакын алмаштышышт, увер да консультаций рӱдер, вольыкым ончышо кресаньык-фермер озанлык вуйлатыше-влак ушненыт. Семинарыште нуно республикыште вольыкым ончымо сомылын вияҥме корныжым, кундемысе шӧрым ужалыме ситуацийым, вольыкын генетикыжым да моло пӱсӧ йодышым лончыленыт, шуктышаш паша радамым палемденыт. Зональный погынымаште БР Правительство Премьер-министрын алмаштышыже - ял озанлык министр Ильшат Фазрахманов, БР Ял озанлык министерствын моло пашаеҥже-влак лийыныт.